Weather : આજે કેટલાક જિલ્લાઓમાં અતિભારે વરસાદને લઈ રેડ એલર્ટ અપાયું

17 જૂન સુધી રાજ્યમાં મધ્યમથી ભારે વરસાદની આગાહી કરવામાં આવી છે, આજે કેટલાક જિલ્લાઓમાં અતિભારે વરસાદની આગાહી હવામાન વિભાગે કરી છે, દક્ષિણ ગુજરાત અને સૌરાષ્ટ્રમાં ભારે વરસાદની આગાહી કરાઈ છે.

અતિભારે વરસાદનું રેડ અલર્ટ

રાજયમાં આજે અતિભારે વરસાદને લઈ રેડ એલર્ટ આપવામાં આવ્યું છે, સુરત, નવસારી, વલસાડમાં અતિભારે વરસાદનું રેડ અલર્ટ આપવામાં આવ્યું છે, દાદરાનગર હવેલી, સુરેન્દ્રનગર, પોરબંદર, જામનગર, ભરૂચ, આણંદ, વડોદરા, નર્મદા, છોટાઉદેપુર, ડાંગ અને તાપીમાં ભારે વરસાદની આગાહી કરવામાં આવી છે.

આગામી પાંચ દિવસ માછીમારોને દરિયો ન ખેડવા સૂચના

આવતીકાલે કાલે કચ્છ, ગીર સોમનાથ, જૂનાગઢમાં પણ અત્યંત ભારે વરસાદની આગાહી કરવામાં આવી છે, 18 થી 22 જૂન રાજ્યમાં સાર્વત્રિક ભારે વરસાદની આગાહી કરવામાં આવી છે, આગામી પાંચ દિવસ માછીમારોને દરિયો ન ખેડવા સૂચના અપાઈ છે, પવનની ગતિ 25-35 કિમી પ્રતિકલાકની રહેશે અને અમદાવાદમાં હળવાથી મધ્યમ વરસાદની આગાહી કરાઈ છે.

બપોરે 2 વાગ્યા સુધી 100 તાલુકાઓમાં વરસાદ નોંધાયો

રાજયમાં આજે બપોરના 2 વાગ્યા સુધી 100 તાલુકામાં વરસાદ નોંધાયો છે, ભાવનગર જિલ્લામાં ધમાકેદાર વરસાદ પડી રહ્યો છે, જેસરમાં સૌથી વધુ 9 ઇંચ વરસાદ, પાલિતાણામાં 8 ઇંચ, મહુવામાં 7 ઇંચ, ગારિયાધારમાં 3 ઇંચ, તળાજામાં 3 ઇંચ, સિહોરમાં 3 ઇંચ, રાજુલામાં 3 ઇંચ, ઉમરગામમાં 1.22 ઇંચ, ઉનામાં 1.22 ઇંચ, સુત્રાપાડામાં 1.14 ઇંચ વરસાદ નોંધાયો.