અમરેલી જિલ્લામાં લુખ્ખા તત્ત્વો બેફામ બની રહ્યા હોય તેમ આમ જનતા પર દાદાગીરી કરીને પોતાનો રૌફ જમાવતા જોવા મળી રહ્યા છે. આ અસામાજિક તત્ત્વોને પોલીસનો કોઈ ભય ન હોય તેમ સરા જાહેરમાં ગુનાની ઘટનાને અંજામ આપી રહ્યા છે. આવામાં અમરેલી પોલીસ મુકપ્રેક્ષક બનીને જોઈ રહી હોય તેમ જણાઈ રહ્યું છે. અમરેલીમાં બે દિવસ પહેલા એક બેન્ક કર્મચારી પર જીવલેણ હુમલો કરવામાં આવ્યો હતો. આ ઘટનાના સીસીટીવી સામે આવ્યા છે.
બેંકના કર્મચારી પર જીવલેણ હુમલો
અમરેલી જિલ્લાના લીલીયા તાલુકામાં આવેલા ક્રાંકચ ગામની બેંકના કર્મચારીને 18 નવેમ્બરના રોજ માર મારવામાં આવ્યો હતો. આ ઘટનામાં જોઈ શકાય છે કે, ત્રણ યુવકો ગાડીમાં આવે છે, અને લાકડી સાથે કર્મચારી પર તૂટી પડે છે. આસપાસના લોકો મારામારીથી ડઘાઈ ગયા હતા. ત્રણ યુવકોમાંથી એક યુવકે કર્મચારીને પકડી રાખ્યો હતો, જ્યારે અન્ય બે યુવકો તેને લાકડી વડે માર મારતા જોવા મળી રહ્યા છે. આ સમગ્ર મામલે પોલીસ દ્વારા ફરિયાદ નોંધવામાં આવી છે.
