Amreliમાં અનરાધાર વરસાદે મચાવી તબાહી, ભારે વરસાદના લીધે જાફરાબાદનો દરિયો ગાંડોતુર

અમરેલીમાં વરસાદે તબાહી મચાવી છે. અમરેલીમાં રાજુલા અને જાફરાબાદમાં ભારે વરસાદનું જોર જોવા મળ્યું. ધોધમાર વરસાદના પગલે જાફરાબાદનો દરિયો ગાંડોતુર થયો છે. જિલ્લામાં ફરી પાછા વરસાદની ધમાકેદાર બેટિંગ જોવા મળી. MLA અને કલેકટરે જાફરાબાદની મુલાકાત લીધી. ભારે વરસાદથી દરિયામાં ભારે કરંટ જોવા મળ્યો. ખરાબ વાતાવરણના કારણે તંત્ર દ્વારા તમામ બોટોને પરત ફરવા સૂચના આપવામાં આવી.

ભારે વરસાદે મચાવી તબાહી

છેલ્લા કેટલાક દિવસથી અમરેલીમાં ફરી ધોધમાર વરસાદનું આગમન થયું. ધારી ગીર પંથકમાં ભારે વરસાદથી નદી-નાળા છલકાયા અને ગોરડિયો નદીમાં ઘોડાપૂર આવ્યું. નદીમાં ઘોડાપૂર આવતા રસ્તા પર ઠેર-ઠેર પાણી જોવા મળ્યું. જિલ્લા કલેકટરે લીધી જાફરાબાદ મુલાકાત લીધી. દરમિયાન રાજુલાના ધારાસભ્યએ પણ વરસાદને લઈને તમામ સ્થિતિ અંગે રાજ્યના મુખ્યમંત્રી ભૂપેન્દ્ર પટેલ સાથે વાત કરી. આ ઉપરાંત સાવરકુંડલા શહેરમાં પણ ભારે વરસાદને પગલે નીચાણવાળા વિસ્તારોમાં પાણી ભરાઈ જતા લોકોને તહેવારના દિવસોમાં હાલાકીનો સામનો કરવો પડી રહ્યો છે.

માછીમારોને દરિયો ના ખેડવા સૂચના

ભારે વરસાદના કારણે દરિયામાં કરંટ જોવા મળ્યો. જ્યારે જાફરાબાદ અને ગીર સોમનાથ જિલ્લાની બે બોટે દરિયામાં જળસમાધિ લીધી. બંને બોટમાં કુલ 18 માછીમારો સવાર હતા તેમાંથી 10ને બચાવી લેવાયા છે જ્યારે અન્ય ગુમ થયેલ માછીમારોની તંત્ર દ્વારા શોધખોળ હાથ ધરાઈ છે. હમીર સોલંકી કે જેઓ જાફરાબાદ કોળી સમાજ બોટ એસોસિએશનના પ્રમુખ છે તેમણે સમગ્ર સ્થિતિને લઈને ફિશરીજ વિભાગને માહિતી આપી. હવામાન વિભાગના જણાવ્યા અનુસાર ગુજરાતમાં એક સાથે પાંચ સિસ્ટમ એક્ટિવ થતા વાવાઝોડા સાથે વરસાદનું જોર જોવા મળ્યું છે. ખરાબ વાતાવરણના કારણે દરિયામાં પણ કરંટ જોવા મળતા માછીમારોને દરિયો ના ખેડવા સૂચના આપવામાં આવી.