Aravalliના બાયડમાં મેઘરાજા મન મૂકીને વરસ્યા, લોકોને અસહ્ય ઉકળાટ બાદ મળી રાહત

અરવલ્લી જિલ્લાના બાયડ તાલુકામાં આજે લાંબા વિરામ બાદ ફરી એકવાર વરસાદી માહોલ જામ્યો હતો. બપોર બાદ અચાનક વાતાવરણમાં પલટો આવ્યો અને ગાજવીજ સાથે ધોધમાર વરસાદ શરૂ થયો હતો. આ વરસાદને કારણે વાતાવરણમાં ઠંડક પ્રસરી ગઈ હતી અને છેલ્લા ઘણા દિવસોથી ચાલી રહેલા ઉકળાટ અને બફારાથી લોકોને મોટી રાહત મળી હતી. આ વરસાદની અસર ખાસ કરીને મોડાસા-નડિયાદ સ્ટેટ હાઈવે પર જોવા મળી હતી.

વરસાદ વરસતા ઉકળાટ અને બફારાથી લોકોએ રાહત અનુભવી

ભારે વરસાદને કારણે હાઈવે પર ઠેર-ઠેર પાણી ભરાયા હતા. ભારે વરસાદથી વાહનચાલકોને ભારે મુશ્કેલીનો સામનો કરવો પડ્યો હતો. ઘણા વાહનો ધીમી ગતિએ ચલાવવાની ફરજ પડી હતી. જોકે થોડા સમય બાદ પાણીનો નિકાલ થતાં વાહનવ્યવહાર પૂર્વવત થયો હતો. બાયડ શહેરમાં પણ અનેક વિસ્તારોમાં પાણી ભરાયા હતા. ખાસ કરીને બાયડ વીજ કચેરીની આગળ પાણીનો ભરાવો થતા લોકોને હાલાકી પડી હતી.

બાયડમાં વીજ કચેરી આગળ ભરાયા પાણી

આ વિસ્તારમાં ઘૂંટણસમા પાણી ભરાઈ ગયા હતા. જેના કારણે રાહદારીઓને અને વાહનચાલકોને ભારે મુશ્કેલીનો સામનો કરવો પડ્યો હતો. તેમજ આ વરસાદ ખેડૂતો માટે આશીર્વાદરૂપ સાબિત થયો હતો. ઘણા સમયથી ખેડૂતો વરસાદની આતુરતાપૂર્વક રાહ જોઈ રહ્યા હતા. કારણ કે પાકને પાણીની જરૂર હતી. આ વરસાદથી કપાસ, મગફળી, અને ડાંગર જેવા પાકોને નવજીવન મળ્યું હતું અને ખેડૂતોમાં આનંદની લાગણી છવાઈ હતી. વરસાદના કારણે પાકને સારો વિકાસ મળવાની આશા બંધાઈ હતી. જેનાથી આગામી દિવસોમાં સારી ઉપજ મળવાની સંભાવના છે.