Bhavnagar News : કંઇક મોટું થવાનું હતું!, LCB દ્વારા શંકાસ્પદ મુદ્દામાલ સાથે બે ઝડપાયા

ભાવનગરના મહુવા તાલુકાના તલગાજરડા ગામ પાસે LCB દ્વારા શંકાસ્પદ મુદ્દામાલ સાથે બે ટ્રક જપ્ત કરીને બે આરોપીઓની ધરપકડ કરવામાં આવી છે. પોલીસે આશરે રૂપિયા 27.32 લાખનો મુદ્દામાલ જપ્ત કરીને વધુ કાર્યવાહી હાથ ધરી છે.

બે શંકાસ્પદ ટ્રક મળ્યા

પોલીસને મળેલી ગુપ્ત માહિતીના આધારે, મહુવાના તલગાજરડા નજીક તપાસ કરવામાં આવી હતી. આ દરમિયાન, પોલીસે બે શંકાસ્પદ ટ્રકને અટકાવીને તેની તપાસ કરી હતી. તપાસમાં એક ટ્રકમાંથી 275 લિટર જેટલો જ્વલનશીલ પ્રવાહીનો જથ્થો મળી આવ્યો હતો. જ્યારે બીજી ટ્રકમાં મોટા પ્રમાણમાં લસણનો જથ્થો મળી આવ્યો હતો. આ મુદ્દામાલ અંગે કોઈ સંતોષકારક ખુલાસો ન મળતા પોલીસે બંને ટ્રક અને મુદ્દામાલ જપ્ત કર્યો હતો.

પોલીસે બે શખ્સોની ધરપકડ કરી

આ મામલે પોલીસે શાહિદ સૈયદ અને તૌફિક વસાયા નામના બે શખ્સોની ધરપકડ કરી છે. પોલીસ હાલ એ દિશામાં તપાસ કરી રહી છે કે, આ જ્વલનશીલ પ્રવાહી ક્યાંથી લાવવામાં આવ્યું હતું અને ક્યાં લઇ જવામાં આવી રહ્યું હતું. આ સિવાય લસણના જથ્થા પાછળનો હેતુ શું હતો તેની પણ તપાસ ચાલુ છે. LCB દ્વારા આ કૌભાંડના મૂળ સુધી પહોંચવા માટે ઉંડાણપૂર્વક તપાસ હાથ ધરવામાં આવી છે.