Rajkot Gold Rate : સોનાના ભાવમાં મોટો વધારો, સોની બજારમાં મોટી મંદીનો માહોલ

એક તરફ લગ્નની સિઝન આવી રહી છે તો બીજી તરફ હાલ સોનાના ભાવમાં વધઘટ જોવા મળી રહી છે. જેની સીધી અસર સોની બજારમાં દેખાઈ રહી છે. છેલ્લા ઘણા દિવસોથી સોનાના ભાવ સતત વધી રહ્યા હતા, પરંતુ 15 દિવસ પહેલા સોનાના ભાવમાં 4000 રૂપિયાનો ઘટાડો થયો હતો. ભાવ ઘટવાની સાથે જ લોકોએ સોનાનું બુકિંગ શરૂ કરી દીધું હતું.

30થી 40% ભાવ સોનામાં વધ્યો

પરંતુ એક સપ્તાહ પહેલા 2000 રૂપિયા જેવો ભાવ વધારો આવતા હાલમાં 22 કેરેટ 10 ગ્રામ સોનાનો ભાવ 89,150 રૂપિયા બોલાઈ રહ્યો છે. જેના લીધે હાલ સોની બજારમાં મંદીની અસર દેખાઈ રહી છે. ગત વર્ષની સરખામણીએ આ વર્ષે 30થી 40% જેવી અસર જોવા મળી રહી છે. ત્યારે ગ્રાહકોને આકર્ષવા માટે અમુક વેપારીઓ દ્વારા મેકિંગ ચાર્જ ઉપર નાનું મોટું ડિસ્કાઉન્ટ આપવામાં આવી રહ્યું છે. સોની વેપારીઓ પણ આશા રાખીને બેઠા છે કે સોનાના ભાવમાં ઘટાડો થાય અને ફરી એક વખત બજારમાં ગ્રાહકોની ભીડ જામે.

લોકો અન્ય દાગીઓની ખરીદી કરવા તરફ વળ્યા

ઉલ્લેખનીય છે કે છેલ્લા કેટલાય સમયમાં સોનાના ભાવમાં મોટો વધારો થયો છે, કારણ કે વિશ્વભરમાં અનેક દેશો એકબીજા સામે યુદ્ધ કરી રહ્યા છે. છેલ્લા 2 વર્ષથી રશિયા-યુક્રેન વચ્ચે પણ યુદ્ધ ચાલી રહ્યું છે અને તેની પણ અસર બુલિયન માર્કેટમાં જોવા મળી રહી છે. જો કે સામાન્ય વ્યક્તિઓ માટે હવે તો સોનું લેવાનું વિચારવું પણ એક સપનું બની ગયું છે. ત્યારે સોનાના ભાવમાં મોટો વધારો થતાં લોકો હવે 18 કેરેટના સોના તરફ કે અન્ય દાગીનાઓ ખરીદવા તરફ આકર્ષાયા છે.