અમદાવાદમાં સોશિયલ મીડિયા પર ફેમસ થવાના શોખમાં કેટલાક યુવાનો કાયદાનું ઉલ્લંઘન કરતા જોવા મળ્યા છે. તાજેતરમાં, અમદાવાદના રિવરફ્રન્ટ પર અટલ બ્રિજ પાસે બે યુવકોએ હથિયારો સાથે રિલ બનાવીને સોશિયલ મીડિયા પર વાયરલ કરી છે. આ રિલમાં યુવકો બે બંદૂક સાથે 'રોલા મારતા' જોવા મળે છે, જેણે પોલીસ અને પ્રશાસનની ચિંતા વધારી છે. આ ઘટના બાદ પોલીસ તંત્ર હરકતમાં આવ્યું છે અને રિલ બનાવનાર યુવકોની સઘન શોધખોળ શરૂ કરી છે.


યુવકે હથિયાર સાથે પોઝ આપ્યા

વાયરલ થયેલી આ રિલમાં સ્પષ્ટપણે જોઈ શકાય છે કે, યુવકો જાહેર સ્થળે, જ્યાં લોકોની અવરજવર વધુ હોય છે, ત્યાં હથિયાર સાથે પોઝ આપી રહ્યા છે. આ પ્રકારની પ્રવૃત્તિ માત્ર કાયદાનું ઉલ્લંઘન જ નથી, પરંતુ સમાજમાં એક ખોટો સંદેશ પણ ફેલાવે છે. પોલીસે આ રિલને ગંભીરતાથી લીધી છે અને ટેકનિકલ સર્વેલન્સની મદદથી યુવકોની ઓળખ કરવાની કામગીરી હાથ ધરી છે. આ સાથે જ, આ હથિયારો અસલી છે કે નકલી તે અંગે પણ તપાસ ચાલી રહી છે.

Also Read

પોલીસે આ મામલે તપાસ ચાલુ કરી

આ ઘટનાએ ફરી એકવાર સોશિયલ મીડિયાના દુરુપયોગ અને યુવાનોમાં વધતા જતા 'ગન કલ્ચર'ના વલણ પર સવાલ ઊભા કર્યા છે. પોલીસે જણાવ્યું છે કે, જે કોઈ પણ આ રિલ બનાવવા અને વાયરલ કરવા માટે જવાબદાર હશે, તેની સામે કાયદેસરની કડક કાર્યવાહી કરવામાં આવશે. આ મામલે વધુ તપાસ ચાલી રહી છે, અને આગામી સમયમાં રિલ બનાવનાર યુવકો પોલીસની પકડમાં આવશે તેવી શક્યતા છે.


  • Follow us on: