અમદાવાદ સ્થિત જાણીતી નિરમા યુનિવર્સિટીમાં કરોડો રૂપિયાની ઉચાપતનો ગંભીર બનાવ સામે આવ્યો છે. યુનિવર્સિટીના એક કર્મચારી વિરુદ્ધ નાણાંકીય ગેરરીતિ અને ઉચાપતની ફરિયાદ નોંધવામાં આવી છે. આ કર્મચારી પર યુનિવર્સિટી દ્વારા વિદ્યાર્થીઓ પાસેથી લેવામાં આવેલી ડિપોઝિટની રકમ પરત ન કરવાનો આરોપ છે. યુનિવર્સિટી દ્વારા ફરિયાદમાં જણાવ્યા મુજબ, કર્મચારીએ વિદ્યાર્થીઓને પરત કરવાના 5 કરોડ રૂપિયાની રકમની ઉચાપત કરી છે.
બે વર્ષમાં 5 કરોડનું ફુલેકું
ફરિયાદ અનુસાર, કર્મચારીએ આ ઉચાપતનો કારસો છેલ્લા 2 વર્ષના સમયગાળા દરમિયાન રચ્યો હતો. કર્મચારીએ આ સમય દરમિયાન તબક્કાવાર રીતે વિદ્યાર્થીઓની ડિપોઝિટના 5 કરોડ રૂપિયા પોતાના પરિવારના સભ્યો અને નજીકના મિત્રોના બેંક ખાતામાં ગેરકાયદેસર રીતે ટ્રાન્સફર કર્યા હતા. આ સમગ્ર કૌભાંડમાં યુનિવર્સિટીના કર્મચારી પ્રકાશ રાઠોડ સહિત કુલ 7 વ્યક્તિઓ વિરુદ્ધ ફરિયાદ નોંધવામાં આવી છે, જેઓ આ ઉચાપતમાં સીધી કે આડકતરી રીતે સંડોવાયેલા હોવાનું માનવામાં આવે છે.
