અમરેલી જિલ્લાની સ્પેશિયલ ઑપરેશન ગ્રુપ (SOG)ની ટીમે જિલ્લામાં ગેરકાયદેસર ડ્રગ્સની પ્રવૃત્તિઓ પર લગામ કસવા માટે એક અત્યંત સફળ ઓપરેશન પાર પાડ્યું છે. SOG ટીમને ચોક્કસ બાતમી મળી હતી કે કેરાળા ગામથી મતીરાળા તરફના સીમ વિસ્તારમાં એક વાડીમાં મોટા પાયે ગાંજાનું ગેરકાયદેસર વાવેતર કરવામાં આવ્યું છે. આ બાતમીના આધારે SOGની ટીમે તાત્કાલિક દરોડો પાડ્યો હતો. આ કાર્યવાહીમાં પોલીસે છના હરી પંચાલા નામના 50 વર્ષીય આરોપીને રંગેહાથે ઝડપી લીધો હતો. આરોપી પોતાની ભાગ્યું રાખેલી વાડીમાં ગુપ્ત રીતે આ ગેરકાયદેસર ધંધો કરી રહ્યો હતો.
77 લાખથી વધુના ગાંજાનો જથ્થો જપ્ત
SOG દ્વારા વાડીમાં કરવામાં આવેલી તપાસ દરમિયાન, પોલીસને આશરે 48 લીલા ગાંજાના છોડ મળી આવ્યા હતા, જેનું વજન 155 કિલો 865 ગ્રામ જેટલું થયું હતું. આ જથ્થાની આંતરરાષ્ટ્રીય બજાર કિંમત આશરે રૂ. 77,93,250 જેટલી થાય છે. SOGએ આ વિશાળ ગાંજાના છોડ અને તેના વાવેતરમાં વપરાયેલો અન્ય મુદ્દામાલ પણ જપ્ત કર્યો છે. ગુજરાતમાં આટલા મોટા પ્રમાણમાં ગાંજાનું વાવેતર ઝડપાવવાની ઘટનાએ ડ્રગ્સ માફિયાઓમાં ખળભળાટ મચાવ્યો છે. પોલીસે આ તમામ મુદ્દામાલની જપ્તી કરીને આરોપી વિરુદ્ધ NDPS એક્ટ હેઠળ ગુનો નોંધીને કાયદેસરની કાર્યવાહી શરૂ કરી છે.
