દેશની રક્ષા માટે સરહદ પર કોઈપણ સ્થિતિમાં અડીખમ ઉભા રહેલા આર્મીના જવાનો દેશનું ગૌરવ છે. આ જવાનોનો પરિવાર દેશમાં પણ સુરક્ષિત નથી. ભાવનગરના અકવાડામાં આર્મીના જવાનના પરિવાર પર બેફામ બનેલા બુટલેગરોએ હુમલો કર્યો હતો. આ ઘટનાને લઈ પોલીસ પણ ફરિયાદ નહીં નોંધતી હોવાનો આક્ષેપ કરવામાં આવ્યો છે. આર્મીના જવાને એક વીડિયો બનાવીને મદદ માગી છે.
ભાવનગરના અકવાડામાં પરિવાર પર થયો હતો હુમલો
પ્રાપ્ત વિગતો પ્રમાણે ભાવનગર શહેરના અકવાડા ગામે થોડા દિવસ પહેલા આર્મીના જવાનના પરિજનો પર હુમલો કરાયો હોવાની ઘટના સામે આવી હતી. કેટલાક ઈસમો દ્વારા નશાની હાલતમાં આર્મીના જવાનના પરિવારજનો સાથે માથાકૂટ કરી હુમલો કર્યો હતો. અકવાડા ગામે રહેતા વિશાલ રાઠોડ અને તેનો ભાઈ ભારતીય સેનામાં લદ્દાખ બોર્ડર પર ફરજ બજાવે છે. તેણે એક વીડિયો બનાવીને પરિવારની સુરક્ષા માટે મદદ માગી છે. આ ઘટના બાદ સેનાના જવાનના પરિવારજનો પોલીસ ફરિયાદ કરવા ગયા હતાં પણ પોલીસે ફરિયાદ લીધી નહોતી.
