ગુજરાતના દ્વારકા જિલ્લાના ઓખામાં લગ્નજીવનમાં ચાલી રહેલા ખટરાગના કારણે એક નવદંપતીએ આત્મદાહ કરવાનો ગંભીર પ્રયાસ કરતા સમગ્ર વિસ્તારમાં ચકચાર મચી ગઈ છે. પ્રાથમિક માહિતી મુજબ, પતિ-પત્ની વચ્ચે લાંબા સમયથી ચાલી રહેલા ઝઘડાએ ગંભીર સ્વરૂપ ધારણ કર્યું હતું. આ વિવાદના કારણે ગુસ્સે ભરાયેલા પતિએ તેની પત્નીના પિયરમાં જઈને ઉગ્ર ઝઘડો કર્યો હતો. આ ઝઘડાની પરાકાષ્ઠાએ પતિએ આવેશમાં આવીને એક અત્યંત આઘાતજનક પગલું ભર્યું હતું.
પતિના પ્રયાસમાં પત્ની પણ દાઝી
આ ઉગ્ર ઝઘડા બાદ ગુસ્સા પર કાબૂ ગુમાવનાર પતિએ પોતાની જાત પર પેટ્રોલ છાંટી દીધું અને આત્મદાહ કરવાનો પ્રયાસ કર્યો હતો. સળગી રહેલા પતિને જોઈને પત્નીએ તેને બચાવવાનો પ્રયાસ કર્યો હતો, પરંતુ આ પ્રયાસમાં પતિએ પોતાની પત્નીને બાથમાં લઈ લેતા તે પણ આગની લપેટમાં આવી ગઈ હતી. આ દુર્ઘટનામાં પતિ અને પત્ની, બંને ગંભીર રીતે દાઝી ગયા હતા. તાત્કાલિક 108 એમ્બ્યુલન્સની મદદથી બંને ઈજાગ્રસ્ત દંપતીને સારવાર અર્થે નજીકની હોસ્પિટલમાં ખસેડવામાં આવ્યા છે.
