Dwarka : જામખંભાળિયામાં વાહનચાલકે કાબુ ગુમાવતા રોડની બાજુ પર ભયંકર રીતે પટકાઈ કાર, અકસ્માતમાં 1નું મોત અને 3 ઇજાગ્રસ્ત

દ્વારકા નેશનલ હાઈવે પર ગંભીર અકસ્માતની ઘટના બનવા પામી. બોટાદથી 4 મિત્રો પોતાના ખાનગી વાહનમાં દ્વારકા જવા નીકળ્યા હતા. ત્યાં જામખંભાળિયા નજીક કાર પલટી જતા ગમખ્વાર અકસ્માત બનવા પામ્યો. દ્વારકા મંદિર જતા પહેલા જ કારમાં સવાર મિત્રોને અકસ્માત નડયો. આ ભયાનક અકસ્માતમાં 1 વ્યક્તિનું મોત નિપજયું જ્યારે અન્ય 3 મિત્રો ગંભીરપણે ઘાયલ થયા. સમગ્ર મામલે પોલીસે અકસ્માતનો ગુનો નોંધી કાર્યવાહી હાથ ધરી.

વાહનચાલકની બેદરકારીએ સર્જયો અકસ્માત

રાજ્યના માર્ગો પર અકસ્માતનો સિલસિલો યથાવત જોવા મળ્યો. હાલમાં દ્વારકાના જામખંભાળિયામાં ગંભીર અકસ્માતની ઘટના સામે આવી છે. મળતી વિગત મુજબ જામ ખંભાળિયા નજીક નેશનલ હાઈવે પર કાર પલ્ટી જતા આ અકસ્માત બન્યો હોવાનું સામે આવ્યું. હાઈવે પર પૂરપાટ વેગે જતી સ્વીફ્ટ કાર દાંતા ગામ નજીકથી પસાર થતી હતી ત્યારે વાહનચાલકે કાબુ ગુમાવતા રોડની બાજુ પર ભયંકર રીતે કાર પટકાઈ. કાર ઊંધી વળી ગઈ અને ભયંકર રીતે નીચે પટકાતા તેમાં સવાર ચારેય જણાને ગંભીર ઇજા પહોંચી હતી.

પોલીસે કાર ચાલક વિરુદ્ધ નોંધ્યો ગુનો

આ અકસ્માતમાં ઘાયલ તમામ 4 મિત્રો સ્વિફ્ટ કારમાં બોટાદથી દ્વારકા દર્શન કરવા જતા હતા. જામખંભાળિયા પાસે વાહનચાલકની બેદરકારીના કારણે અકસ્માત સર્જાયો. આ અકસ્માતમાં 4 મિત્રોમાંથી 1 વ્યક્તિનું ગંભીર ઇજાના પગલે સારવાર મળે તે પહેલા ઘટનાસ્થળે મોત નિપજયું. સ્થાનિક દ્વારા પોલીસને અકસ્માતની જાણ કરવામાં આવી. પોલીસે ઘટનાસ્થળ પર પહોંચી કાર ચાલક વિરૂધ્ધ અકસ્માતનો ગુનો નોંધ્યો. આ અકસ્માતમાં મૃત્યુ પામનાર યુવકનું નામ રવી પટેલ છે. જ્યારે ઇજા પામેલ 3 મિત્રોને સારવાર અર્થે હોસ્પિટલમાં દાખલ કરવામાં આવ્યા.