ગોંડલ શહેરમાં કાયદો અને વ્યવસ્થાની સ્થિતિને લઈને સવાલો ઊભા થાય તેવી એક ઘટના સામે આવી છે. જેમાં સિવિલ હોસ્પિટલ ચોક વિસ્તારમાં એક જ સમાજના બે જૂથો વચ્ચે સરાજાહેર મારામારી થઈ હતી. આ જૂથ અથડામણમાં કુલ પાંચ જેટલા લોકોને ઈજા પહોંચી છે. સિવિલ હોસ્પિટલ ચોક જેવા જાહેર સ્થળે બે જૂથો અચાનક સામસામે આવી ગયા હતા અને તેમની વચ્ચે કોઈ અંગત બાબત કે જુની અદાવતને લઈને ઉગ્ર બોલાચાલી અને ત્યારબાદ મારામારી થઈ હતી.
સિવિલ હોસ્પિટલ ચોક વિસ્તારમાં થઈ મારામારી
આ મારામારીમાં બંને જૂથના મળીને કુલ પાંચ જેટલા વ્યક્તિઓ ઈજાગ્રસ્ત થયા હતા. ઘટનાની જાણ થતાં જ ઈજાગ્રસ્તોને તાત્કાલિક સારવાર અર્થે સિવિલ હોસ્પિટલમાં ખસેડવામાં આવ્યા હતા. આ ઘટનાની ગંભીરતાને જોતા ગોંડલના બંને ડિવિઝન PI સહિત પોલીસનો મોટો કાફલો તરત જ સિવિલ હોસ્પિટલ અને ઘટનાસ્થળે દોડી આવ્યો હતો. પોલીસે પરિસ્થિતિ પર કાબૂ મેળવ્યો હતો અને મામલો થાળે પાડ્યો હતો.
