રાજ્યમાં સરકારી જમીનોને દબાણમુક્ત કરવાની ઝુંબેશ અંતર્ગત કચ્છના અબડાસામાં વહીવટી તંત્ર દ્વારા એક મહત્વની અને મોટી કાર્યવાહી હાથ ધરવામાં આવી છે. અબડાસાના હોથીવાંઢ વિસ્તારમાં સરકારી માલિકીની જમીન પરના ગેરકાયદેસર દબાણને સફળતાપૂર્વક હટાવી દેવામાં આવ્યું છે. હોથીવાંઢ ખાતે એક વ્યક્તિ દ્વારા સરકારી જમીન પર લાંબા સમયથી દબાણ કરવામાં આવ્યું હતું. આ દબાણ કરનાર વ્યક્તિનું નામ ભારુભા સોઢા જણાવવામાં આવ્યું છે.
ભારુભા સોઢાએ 9 એકર જમીન પર કર્યું હતું દબાણ
જેમણે આશરે 9 એકર જેટલી વિશાળ સરકારી જમીન પર ગેરકાયદેસર કબજો જમાવ્યો હતો. આ જમીનની અંદાજિત બજાર કિંમત રૂપિયા 27 લાખ આંકવામાં આવી છે. વહીવટી તંત્ર દ્વારા આ દબાણ હટાવવા માટે સંપૂર્ણ તૈયારી સાથે ઓપરેશન હાથ ધરવામાં આવ્યું હતું. દબાણની ગંભીરતાને ધ્યાનમાં રાખીને કોઈ અનિચ્છનીય ઘટના ન બને તે માટે પોલીસનો પૂરતો બંદોબસ્ત પણ ગોઠવવામાં આવ્યો હતો. પોલીસની હાજરીમાં તંત્રની ટીમે જેસીબી મશીનોની મદદથી ગેરકાયદેસર દબાણ દૂર કરવાની કામગીરી શરૂ કરી હતી.
