Mahisagar News: નલ સે જલ કૌભાંડમાં ભાજપના યુવા મોરચાના પૂર્વ પ્રમુખની ધરપકડ, 12 કર્મચારીઓ સામે તપાસ તેજ

મહીસાગર જિલ્લાના 620 ગામોમાં નલ સે જલ યોજનામાં વ્યાપક ગેરરીતિ સામે આવતાં CID ક્રાઇમમાં ફરિયાદ નોંધાઈ હતી. આ કેસમાં CID ક્રાઈમ દ્વારા ભાજપ યુવા મોરચાના પૂર્વ પ્રમુખની ધરપકડ કરવામાં આવી છે. ચિરાગ પટેલ અને કે.ડી. વણકરની ધરપરડ કરવામાં આવી છે. આ ઉપરાંત કોન્ટ્રાક્ટ એજન્સી સામે પણ સકંજો કસવામાં આવ્યો છે. આ કૌભાંડમાં 12 કર્મચારીઓ પૈકી બેની અટકાયત કરવામાં આવી છે. જિલ્લામાં 12 કર્મચારીઓ સામે તપાસ તેજ કરાઈ છે.

ભાજપ યુવા મોરચા પૂર્વ પ્રમુખની ધરપકડ

પ્રાપ્ત વિગતો પ્રમાણે મહિસાગર જિલ્લાના 620 ગામોમાં નલ સે જલ યોજના અંતર્ગત પીવાના પાણીની પાઈપ લાઈન, કૂવા અને ટ્યૂબવેલ વગેરેની સુવિધા માટે રાજ્ય સરકારે કરોડો રૂપિયાની ફાળવણી કરી હતી. આ યોજનામાં કૌભાંડ આચરવા મુદ્દે ખાતકિય તપાસ શરૂ કરાઈ હતી. ત્યાર બાદ વાસ્મોના યુનિટ મેનેજર દ્વારા CID ક્રાઈમમાં કૂલ 12 આરોપીઓ સામે ફરિયાદ નોંધાવાઈ હતી. પોલીસે આ કૌભાંડમાં ભાજપના યુવા મોરચાના પૂર્વ પ્રમુખ ચિરાગ પટેલ અને કે.ડી. વણકરની ધરપકડ કરી છે. આ ઉપરાંત કોન્ટ્રાક્ટ કર્મચારીઓ સામે પણ સકંજો મજબૂત કરવામાં આવ્યો છે.

ગાંધીનગર CID ક્રાઈમે બન્ને ઝડપી પાડ્યા

સુત્રોના જણાવ્યા પ્રમાણે વાસ્મોના કેટલાક અધિકારી અને કર્મચારીઓએ એજન્ટ અને ખાનગી કંપનીને લાભ કરાવવા માટે ગામોની પાઈપ લાઈન અને ઘર જોડાણની કામગીરીના હિસાબના ખોટા રીપોર્ટ દર્શાવીને ડોક્યુમેન્ટ તૈયાર કર્યા હતાં. આરોપીઓએ સરકારને 123 કરોડથી વધુનું નુકસાન પહોંચાડ્યું હતું. આ ઘટનામાં સીઆઈડી ક્રાઈમે સકંજો મજબૂત કર્યો છે અને આરોપીઓને ઝડપવા કામગીરી શરૂ કરી છે.