ગુજરાતમાં વિદેશી દારુ સહિત માદક દ્રવ્યોની હેરાફેરી અને વેચાણના કિસ્સા વધુ પ્રમાણમાં સામે આવી રહ્યાં છે. અરવલ્લીના માલપુરમાં પોષડોડા લઈને જતા શખ્સને પકડવા ગયેલી પોલીસ પર શખ્સે એક રાઉન્ડ ફાયરિંગ કર્યું હોવાની ઘટના સામે આવી છે. પોષડોડાનો જથ્થો લઈને જતાં પોલીસે ગાડીને ઘેરી લીધી હતી ત્યારે આ શખ્સે પોલીસ પર ફાયરિંગ કર્યું હતું.


પોષડોડાની ગાડી ઘેરાઈ જતા પોલીસ પર ફાયરિંગ

પ્રાપ્ત વિગતો પ્રમાણે અરવલ્લીના માલપુરમાં પોષડોડાનો જથ્થો લઈને જતા શખ્સને પકડવા માટે પોલીસ સક્રિય થઈ હતી. ગલીયાદાંતી ટોલનાકાથી પોલીસે આરોપીની ગાડીનો પીછો કરી ગાડીને ઘેરી લીધી હતી. આ દરમિયાન આરોપીએ પોલીસ પર એક રાઉન્ડ ફાયરિંગ કર્યું હતું. પોલીસે આખરે ફાયરિંગ કરનાર આરોપીને ઝડપી પાડ્યો હતો. પોલીસે આરોપી પાસેથી 13.12 લાખની કિંમતના 437 કિલો પોષડોડાનો જથ્થો ઝડપી પાડ્યો હતો. આ દરમિયાન એક આરોપી પોલીસ પકડથી ફરાર થઈ ગયો હતો.

Also Read

પોલીસે એક રિવોલ્વર અને એક જીવતો કારતૂસ કબજે કર્યો

માલપુરમાં માદક પદાર્થ પોષડોડા લઈને જતા શખ્સ પાસેથી પોલીસે એક રિવોલ્વર અને એક જીવતો કારતૂસ કબજે કર્યો હતો. માલપુર પોલીસને મારી નાંખવાના આશયથી ફાયરિંગ કરનાર શખ્સની ધરપકડ કરાઈ હતી. જિલ્લા એલસીબી અને માલપુર પોલીસની સંયુક્ત કાર્યવાહીમાં પોલીસની જાનહાની ટળી હતી. હાલ આ શખ્સને પોલીસની હિરાસતમાં રાખવામાં આવ્યો છે.


  • Follow us on: