સુરત શહેરના વેસુ વિસ્તારમાં ફરી એકવાર દારૂબંધીના નિયમોનું સરેઆમ ઉલ્લંઘન થતું જોવા મળ્યું છે, જ્યાં પોલીસે એક દારૂની મહેફિલ પર દરોડો પાડીને કુલ 17 લોકોને ઝડપી પાડ્યા છે. આ યુવાનો એકઠા થઈને જાહેરમાં દારૂની પાર્ટી કરી રહ્યા હતા. પ્રાપ્ત માહિતી અનુસાર, આ તમામ યુવાનો પહેલા ક્રિકેટ રમવા માટે એકઠા થયા હતા અને ત્યાર બાદ તેમણે દારૂની મહેફિલ ગોઠવી હતી. દારૂની પાર્ટીની ખાનગી બાતમી મળતાની સાથે જ વેસુ પોલીસની ટીમે તાત્કાલિક સ્થળ પર પહોંચીને દરોડો પાડ્યો હતો અને તમામ 17 વ્યક્તિઓને પકડી પાડ્યા હતા.
નશાની હાલતમાં 4 નબીરાઓ ઝડપાયા
પોલીસને દારૂની મહેફિલમાંથી ઝડપાયેલા 17 લોકોમાંથી 4 નબીરાઓ નશાની હાલતમાં મળી આવ્યા હતા. પોલીસે આ તમામને મેડિકલ ટેસ્ટ માટે મોકલી આપ્યા હતા, જેમાં 4 વ્યક્તિઓએ દારૂનું સેવન કર્યું હોવાનું સ્પષ્ટ થયું હતું. ગુજરાતમાં કડક દારૂબંધી હોવા છતાં, યુવાનો દ્વારા આ પ્રકારે જાહેરમાં કે ખાનગી સ્થળે દારૂની પાર્ટીઓ કરવી એ કાયદાની ગંભીર અવગણના છે. પોલીસે સ્થળ પરથી દારૂની બોટલો અને અન્ય સામગ્રી પણ જપ્ત કરી છે. નશાની હાલતમાં મળી આવેલા લોકો સામે દારૂબંધીના કાયદા હેઠળ ગુનો દાખલ કરવામાં આવ્યો છે.
