સુરતમાં રંગ અવધૂત સોસાયટીમાંથી તાજેતરમાં ઝડપાયેલી નકલી કોસ્મેટિક ફેક્ટરીના મામલે પોલીસ તપાસમાં એક મોટો અને ચોંકાવનારો ખુલાસો થયો છે. શરૂઆતમાં આ ફેક્ટરીમાંથી ડુપ્લીકેટ કોસ્મેટિક્સ અને ક્રીમનું ઉત્પાદન થતું હોવાનું માનવામાં આવતું હતું, પરંતુ પોલીસની સઘન તપાસ દરમિયાન સામે આવ્યું છે કે આ ફેક્ટરીમાં માત્ર નકલી કોસ્મેટિક પ્રોડક્ટ્સ જ નહીં, પરંતુ ગંભીર પ્રકારની દવામાં વપરાતી ક્રીમની ડુપ્લીકેટ નકલો પણ બનાવવામાં આવતી હતી. આ ઘટસ્ફોટ લોકોના સ્વાસ્થ્ય અને સુરક્ષા માટે મોટો ખતરો ઊભો કરે છે.
ડુપ્લીકેટ ક્રીમ બનાવીને માર્કેટમાં થતું હતું વેચાણ
આ નકલી ફેક્ટરીમાં ગુણવત્તાના કોઈ માપદંડ વિના, અસલી બ્રાન્ડના નામે, દવાઓમાં વપરાતી ક્રીમની ડુપ્લીકેટ નકલો તૈયાર કરવામાં આવતી હતી. આ ડુપ્લીકેટ ક્રીમ બાદમાં વિવિધ માધ્યમો દ્વારા સરળતાથી બજારમાં વેચાણ માટે મૂકવામાં આવતી હતી. આવી નકલી દવાઓ કે ક્રીમનો ઉપયોગ કરવાથી ગ્રાહકોને ચામડીના રોગોથી માંડીને અન્ય ગંભીર સ્વાસ્થ્ય સમસ્યાઓ થઈ શકે છે. પોલીસે સમગ્ર પ્રકરણનો પર્દાફાશ કરીને આ નેટવર્કના મૂળ સુધી પહોંચવા માટે તપાસના ચક્રો ગતિમાન કર્યા છે.
