સુરત મહાનગરપાલિકાના આરોગ્ય વિભાગે તહેવારો દરમિયાન ખાદ્ય પદાર્થોની શુદ્ધતા અને સ્વચ્છતા જાળવવા માટે શરૂ કરેલા અભિયાન અંતર્ગત એક મીઠાઈ વિક્રેતા સામે મોટી કાર્યવાહી કરી છે. ગઈકાલે વિભાગે શહેરની વિવિધ મીઠાઈની દુકાનો પર દરોડા પાડ્યા હતા, તે દરમિયાન 'શિવશક્તિ મીઠાઈ વિક્રેતા'ની દુકાનમાં ગંભીર બેદરકારી સામે આવી હતી. દરોડા દરમિયાન મીઠાઈ રાખવામાં આવેલા એક કેરેટમાં વંદો નજરે પડ્યો હતો, જે દુકાનમાં સ્વચ્છતાના માપદંડોનું ઉલ્લંઘન સૂચવે છે. ગંદકી અને અસ્વચ્છતાને કારણે તંત્રએ આ દુકાન સામે કડક પગલાં લીધાં છે.
120 કિલો મીઠાઈનો જથ્થો નાશ કરાયો, રૂપિયા 10 હજાર દંડ
આરોગ્ય વિભાગ દ્વારા 'શિવશક્તિ મીઠાઈ વિક્રેતા'ની દુકાનમાં વંદો મળતાં તાત્કાલિક ધોરણે કાર્યવાહી કરવામાં આવી હતી. ગ્રાહકોના સ્વાસ્થ્યને જોખમમાં મૂકી શકે તેવા 120 કિલો મીઠાઈના જથ્થાને સ્થળ પર જ નાશ કરવામાં આવ્યો હતો. આ ઉપરાંત, દુકાનધારકને સ્વચ્છતાના નિયમોનું ઉલ્લંઘન કરવા બદલ અને ફૂડ સેફ્ટી એક્ટની જોગવાઈઓનો ભંગ કરવા બદલ રૂપિયા 10,000/- નો દંડ ફટકારવામાં આવ્યો છે. વિભાગની આ સખ્ત કાર્યવાહી સ્પષ્ટ સંકેત આપે છે કે તહેવારોના સમયમાં કોઈપણ પ્રકારની ગંદકી કે ભેળસેળ ચલાવી લેવામાં આવશે નહીં.
