સુરતમાં પોલીસ દ્વારા હોટેલોમાં ચાલતી અનૈતિક પ્રવૃત્તિઓ ડામવા માટે દરોડા પાડવામાં આવ્યા હતાં. સતત ચાર દિવસથી પોલીસ વિવિધ વિસ્તારોમાં સ્થિત હોટેલોમાં દરોડા પાડી રહી છે. ત્યારે આજે શહેરના રાંદેર વિસ્તારમાં એક હોટેલમાંથી દેહ વ્યાપારનો ધંધો ઝડપાયો હતો. રાંદેર વિસ્તારમાં આવેલા વી સ્ક્વેર શોપિંગ મોલમાં આવેલી હોટલ કોવમાં પોલીસ ગ્રાહક બનીને ગઈ હતી. આ દરમિયાન ત્યાં દેહ વ્યાપારનો ધંધો ઝડપાયો હતો.
ફીના પૈસા ભેગા કરવા દેહ વ્યાપારના ધંધામાં ફસાઈ
સુરત પોલીસના ઈન્વેસ્ટીગેટીવ યુનિટ ફોર ક્રાઈમ અગેન્સ વુમન્સની ટીમ રાંદેર વિસ્તારમાં આવેલા વી સ્ક્વેર શોપિંગ મોલમાં આવેલી હોટલ કોવમાં ગ્રાહક બનીને ગઈ હતી. ત્યાં જઈને તપાસ કરતાં હોટેલમાં દેહ વ્યાપારનો ધંધો ચાલતો હતો. પોલીસે ત્યાંથી ગ્રાહક સહિત બે લોકોને ઝડપી પાડ્યા હતાં. પોલીસે ત્યાંથી ચાર ભારતીય મહિલાઓને મુક્ત કરાવી હતી. આ ચાર મહિલાઓ પૈકી એક યુવતી પોલિટિકલ સાયન્સની વિદ્યાર્થિની હતી. આ વિદ્યાર્થિની પાસે ફી ભરવાના પૈસા નહોતા. જેથી ફીના પૈસા ભેગા કરવા માટે તે દેહ વ્યાપારના ધંધામાં ફસાઈ હતી.
