સુરત જિલ્લાના બારડોલીના તેંન ગામે ત્રણ દિવસ અગાઉ 12 સપ્ટેમ્બરના રોજ હત્યાની ઘટના બની હતી. શેરડીના ખેતરમાંથી એક મહિલાનો છરી ના ઘા મારેલી હત્યા કરાયેલ મૃતદેહ મળી આવ્યો હતો. ઘટના બાબતે સ્થાનિક પોલીસ તેમજ જિલ્લા એલસીબી પોલીસ પણ દોડતી થઈ હતી. ઘટનાની ગંભીરતા જોતા જિલ્લા પોલીસ વડા રાજેશ ગઢીયાએ સ્થળનું નિરીક્ષણ કરી ચાર અલગ અલગ ટીમો બનાવી ઝડપી તપાસના આદેશ આપ્યા હતા.
પ્રેમ સબંધમાં ખટરાગ આવતા કરાઈ હત્યા
હત્યાના સ્થળેથી મોબાઇલ અને ચપ્પુ મળતા પોલીસે એફ.એસ.એલ. પરીક્ષણ પણ કરાયું હતું. તેમજ કોલ ડિટેઇલ્સ પણ ચકાસવામાં આવી હતી. મરણ જનારની માતાએ વ્યક્ત કરેલી શંકાને ધ્યાનમાં રાખી જિલ્લા એલ.સી.બી. અને બારડોલી ટાઉન પોલીસની સંયુક્ત ટીમ રાજસ્થાન રવાના કરવામાં આવી હતી, સમગ્ર ઘટનામાં આરોપીને ઉદયપુર નજીકથી ઝડપી લેવાયો હતો. જેનું નામ કમલ ભમરું ભીલ છે અને તેની અટકાયત કરાઈ હતી. જેની પ્રાથમિક પૂછપરછમાં હત્યાનું કારણ સામે આવ્યું હતું.
