Suratની ઉધના પોલીસે ઓનલાઈન છેતરપિંડી કરનાર અને એક વર્ષથી ફરાર ઠગની મહારાષ્ટ્રથી કરી ધરપકડ

સુરતની ઉધના પોલીસે ઓનલાઈન માલ મંગાવીને લાખો રૂપિયાની ઠગાઈ આચરનાર એક ફરાર આરોપીને આખરે મહારાષ્ટ્રમાંથી ઝડપી પાડ્યો છે. આ આરોપીએ સુરત સહિત અન્ય રાજ્યોના વેપારીઓ પાસેથી રૂ.50 લાખથી વધુનો ઇલેક્ટ્રિક સામાન પડાવીને પેમેન્ટ ચૂકવ્યું ન હતું અને છેલ્લા એક વર્ષથી પોલીસને થાપ આપી રહ્યો હતો. ઉધના પોલીસ દ્વારા ધરપકડ કરાયેલા આ ઠગનું નામ ભૂપેન્દ્ર પંચાલ છે. ભૂપેન્દ્ર પંચાલે સુરત, વડોદરા અને ચેન્નઈ જેવા શહેરોના વેપારીઓને નિશાન બનાવ્યા હતા.

ઓનલાઇન સામાન મંગાવી ઠગાઇ કરનાર ઝડપાયો

આરોપીએ વેપારીઓ પાસેથી ઇલેક્ટ્રિક માલ-સામાનનો મોટો જથ્થો ઓનલાઈન મંગાવ્યો હતો. જેની કુલ કિંમત રૂ.50.54 લાખ થતી હતી. જોકે માલ મેળવ્યા બાદ તેણે વેપારીઓને તેનું પેમેન્ટ ચૂકવ્યું ન હતું અને છેતરપિંડી આચરી હતી. પોલીસ સૂત્રોના જણાવ્યા મુજબ આ ઠગાઈનો ભોગ બનેલા વેપારીઓની ફરિયાદના આધારે ઉધના પોલીસે ગુનો નોંધીને તપાસ શરૂ કરી હતી. આરોપી છેલ્લા એક વર્ષથી ફરાર હતો અને વારંવાર પોતાનું લોકેશન બદલતો હતો.

ઉધના પોલીસે ભુપેન્દ્ર પંચાલની ધરપકડ કરી

ટેકનિકલ સર્વેલન્સ અને બાતમીના આધારે ઉધના પોલીસને તેની ભાળ મહારાષ્ટ્રમાંથી મળી હતી. ઉધના પોલીસે તાત્કાલિક એક ટીમ મહારાષ્ટ્ર રવાના કરી હતી અને સફળતાપૂર્વક આરોપી ભૂપેન્દ્ર પંચાલની ધરપકડ કરી હતી. પોલીસે હવે તેની પાસેથી ઠગાઈનો માલસામાન રિકવર કરવા અને આ રેકેટમાં અન્ય કોઈની સંડોવણી છે કે કેમ તે દિશામાં વધુ તપાસ હાથ ધરી છે.