Surat: પોલીસકર્મીએ હોટેલના સંચાલકને ગંદી ગાળો બોલીને માર મારતો વીડિયો વાયરલ

ગુજરાતમાં પોલીસ કર્મીઓ દ્વારા ગંદી ગાળો બોલીને લોકોને માર મારવાના અનેક બનાવો સામે આવી રહ્યાં છે. ત્યારે સુરતમાં પોલીસની અસામાજિક તત્વો જેવી દાદાગીરીનો વીડિયો વાયરલ થયો છે. શહેરમાં હોટેલ મોડી રાત સુધી ખુલ્લી રાખતા દુકાનદારને પોલીસ કર્મીએ માર માર્યો હતો. પોલીસે હોટેલમા પ્રવેશીને અસામાજિક તત્વો જેવું વર્તન કર્યું હતું. બેફામ ગાળો બોલીને દુકાનદારને પોલીસકર્મીએ માર માર્યો હતો.

હોટલ સંચાલક સાથે અસામાજિક તત્વો જેવું વર્તન

પ્રાપ્ત વિગતો પ્રમાણે રાજ્ય સરકાર પોલીસ પ્રજાની મિત્ર બનીને રહે તેવા અનેક વખત દાવા કરવામાં આવ્યાં છે. સરકારના દાવા પર સરેઆમ પાણી ફેરવી નાંખતા પોલીસ કર્મીઓના વીડિયો સતત વાયરલ થઈ રહ્યાં છે. પ્રજાના મિત્ર બનવાની વાત તો દૂર પણ પ્રજા સાથે અસામાજિક તત્વો જેવી દાદાગીરી કરતા પોલીસ કર્મીઓ સતત ખુલ્લા પડી રહ્યાં છે. સુરત શહેરમાં એક હોટેલ સંચાલકે મોડી રાત સુધી હોટેલ ચાલુ રાખવા મુદ્દે સુરત પોલીસના કર્મચારીએ ગંદી ગાળો બોલીને તમાચા માર્યા હતાં. આ ઉપરાંત હોટેલમાં ઘૂસીને કારીગરને પણ માર માર્યો હતો.

પોલીસકર્મીએ બેફામ ગાળો આપી સંચાલકને માર માર્યો

હોટેલનો સંચાલક બે હાથ જોડીને પોલીસને કરગરતો હતો. તે છતાંય પોલીસ કર્મી પોતાના રૌફમાંથી બહાર આવતો નહોતો. હોટેલ સંચાલક સાથે જાણે કોઈ અસામાજિક તત્વો જેવી દાદાગીરી કરીને માર મારી બેફામ ગાળો બોલતો પોલીસ કર્મીનો વીડિયો સોશિયલ મીડિયામાં વાયરલ થઈ રહ્યો છે. પોલીસ કર્મીએ હોટેલમાં ઘૂસતાની સાથે જ એક વ્યક્તિને તમાચો માર્યો હતો અને ત્યાર બાદ કારીગરને પણ માર માર્યો હતો. ગંદી ગાળો પણ બોલી હતી તેવું વીડિયોમાં જોઈ શકાય છે. પોલીસ પ્રજાની મિત્ર બની શકે એવી વાતો કરનારી સરકાર હવે પોલીસને તેના રૌફમાંથી કેવી રીતે બહાર કાઢશે એવા અનેક સવાલો ચર્ચાઈ રહ્યાં છે.