Tapiના વ્યારામાં પ્રેમીએ પ્રેમિકાને દાતરડાથી રહેંસી નાખી અને પોતે નદીમાં કૂદીને કર્યો આપઘાત

તાપી જિલ્લાના વ્યારા તાલુકામાં પ્રેમ સંબંધનો એક કરુણ અને ચોંકાવનારો અંજામ જોવા મળ્યો છે. અહીં પાનવાડી ગામની એક મહિલાની તેના પ્રેમીએ ક્રૂરતાપૂર્વક હત્યા કરી અને ત્યારબાદ પોતે નદીમાં કૂદીને આત્મહત્યા કરી લીધી હતી. આ ઘટનાને કારણે સમગ્ર વિસ્તારમાં શોક અને ચકચાર મચી ગઈ છે.

પ્રેમિકાની હત્યા કર્યા બાદ પ્રેમી યુવકે કર્યો આપઘાત

પાનવાડી ગામની જ્યોતિબેન ચૌધરી નામના મહિલા અને ગામના જ નવીન ચૌધરી નામના યુવક વચ્ચે પ્રેમ સંબંધ હતો. આ સંબંધ અંગે સમાધાન થયા બાદ મહિલાએ પ્રેમ સંબંધ આગળ રાખવાની ના પાડી હતી. આ વાતની અદાવત રાખીને ઉશ્કેરાયેલા પ્રેમી નવીન ચૌધરીએ જ્યોતિબેન પર દાતરડા વડે હુમલો કરી તેની હત્યા કરી નાખી હતી.

પ્રેમિકાએ સબંધ રાખવાની ના પાડતા કરી હત્યા

આ ઘાતકી કૃત્ય કર્યા બાદ હત્યારો પ્રેમી નવીન ચૌધરી ઘટનાસ્થળેથી ફરાર થઈ ગયો હતો અને પીપલવાડા ગામની સીમમાં આવેલી પૂર્ણા નદીમાં કૂદીને આપઘાત કરી લીધો હતો. બંને મૃતક આધેડ વયના હોવાથી તેમના મોતના સમાચારથી આખું ગામ હીબકે ચઢ્યું છે. ઘટનાની જાણ થતાં જ વ્યારા પોલીસ તાત્કાલિક સ્થળ પર પહોંચી હતી. પોલીસે બંને મૃતદેહોનો કબજો લઈ કાયદેસરની કાર્યવાહી હાથ ધરી છે. હત્યા અને આપઘાત બંને મામલે પોલીસે ગુનો નોંધીને વધુ તપાસ શરૂ કરી છે.