Tapi : ગરીબ લોકોને થોડા પૈસાની લાલચ આપીને કરોડોના બેન્ક ટ્રાન્ઝેક્શન કરવા મામલે 3 લોકોની ધરપકડ

તાપી જિલ્લાના વાલોડ તાલુકાના ભીમપોર ગામના ગરીબ આદિવાસી લોકોના ડોક્યુમેન્ટ લઈને દાનની રકમ આપવાની લાલચ આપીને અલગ અલગ બેન્કમાં તેમના બેન્ક એકાઉન્ટ ખોલાવી 3 ઈસમોએ શેર બજારમાં ટ્રેડિંગના નામે તેમના ખાતામાં કરોડો રૂપિયાનો વ્યવહાર કરી દેતા પોલીસે ત્રણેય આરોપીને ઝડપી તેમની ઓફિસ અને ઘર ખાતે સર્ચ ઓપરેશન શરૂ કર્યું છે.

54 લોકોના અલગ અલગ 10 બેન્કમાં એકાઉન્ટ ખોલાવ્યા

જણાવી દઈએ કે તાપી જિલ્લાના વાલોડ તાલુકાના ભીમપોર ગામના ગરીબ આદિવાસી નાગરિકોને દાન આપવાની લાલચ આપીને ભીમપોર ગામના દંપતીએ તેમના મહત્વના ડોક્યુમેન્ટ લઈ સુરતના એક ઈસમ સાથે મળી અલગ અલગ 10 બેન્કમાં બેન્ક એકાઉન્ટ ખોલાવી કરોડો રૂપિયાના વ્યવહાર કરી દેતા ચકચાર મચી ગઈ છે. બનાવને લઈ વાલોડ પોલીસે 3 ઈસમ સામે ગુનો દાખલ કરી તેમની ધરપકડ કરી કાર્યવાહી હાથ ધરી છે. જેમાં પોલીસે ભીમપોર ગામના નરેશ ચૌહાણ અને અમિતા ચૌહાણ તેમજ સુરતના ઘોડદોડ વિસ્તારમાં રહેતા એજન્ટ રુજલ અનિલકુમાર શાહને ઝડપી પૂછપરછ કરતા તેમના દ્વારા શેર બજારમાં ટ્રેડિંગ કરવા 54 વ્યક્તિના બેન્ક એકાઉન્ટ સુરતની અલગ અલગ 10 બેન્કમાં ખોલાવી 3,71,68,564 રૂપિયાના ટ્રાન્જેક્શન કર્યા હોવાનું બહાર આવ્યું છે.

ગરીબ લોકોના બેન્ક એકાઉન્ટમાં કરોડોના બેન્ક વ્યવહાર થયા

હાલ પોલીસે પકડાયેલા ત્રણેય ઈસમોના ઘર અને ઓફિસમાં સર્ચ ઓપરેશન હાથ ધરી નામદાર કોર્ટમાં રજૂ કરી રિમાન્ડ મેળવવાની તજવીજ હાથ ધરી છે. ત્યારે રિમાન્ડ બાદ હજુ પણ કોઈ રહસ્યમય કારણ જાણવા મળે તો નવાઈ નહીં, વાલોડ તાલુકાના ભીમપોર ગામના ઝૂપડામાં રહેતા ગરીબ પરિવારોના મહત્વના ડોક્યુમેન્ટ લઈ ખેલ કરનાર ત્રણેય ઈસમો હાલ પોલીસના કબ્જામાં આવતા સ્થાનિક લોકોએ હાશકારો અનુભવ્યો છે.