વડોદરાની મહારાજા સયાજીરાવ (MS) યુનિવર્સિટી ફરી એકવાર શરમજનક ઘટનાને કારણે વિવાદમાં સપડાઈ છે. શિક્ષણના પવિત્ર ગણાતા આ ધામમાં વિદ્યાર્થી-વિદ્યાર્થિની દ્વારા અશ્લીલ હરકત કરવામાં આવી હોવાનો એક વીડિયો સોશિયલ મીડિયા પર વાયરલ થતાં ભારે ચકચાર મચી ગઈ છે. આ ઘટના યુનિવર્સિટી કેમ્પસમાં નૈતિકતાના ધોવાણ તરફ ઈશારો કરે છે અને યુનિવર્સિટીની ગરિમાને કલંકિત કરે છે. અગાઉ પણ આવા બનાવો સામે આવ્યા હોવા છતાં, કેમ્પસમાં ફરી આવી ઘટના બનતા યુનિવર્સિટીના સત્તાધીશોની સુરક્ષા અને વ્યવસ્થા પર ગંભીર સવાલો ઊભા થયા છે.
પાર્કિંગમાં અશ્લીલ હરકત અને જાગૃત વ્યક્તિ દ્વારા વીડિયો વાયરલ
પ્રાપ્ત માહિતી મુજબ, આ શરમજનક ઘટના MS યુનિવર્સિટીના કોમર્સ ફેકલ્ટી નજીકના પાર્કિંગ વિસ્તારમાં બની હોવાનું અનુમાન છે. વીડિયોમાં દેખાઈ રહ્યું છે કે એક વિદ્યાર્થી અને વિદ્યાર્થિની જાહેરમાં અશ્લીલ હરકતો કરી રહ્યા હતા. આ સમગ્ર કૃત્ય કોઈ જાગૃત વ્યક્તિની નજરે પડતાં તેણે ગુપ્ત રીતે તેનો વીડિયો બનાવી લીધો હતો અને તેને વાયરલ કર્યો હતો. આ વીડિયો ખૂબ જ ઝડપથી ફેલાતા યુનિવર્સિટીના વિદ્યાર્થીઓ અને વાલીઓમાં આક્રોશની લાગણી જોવા મળી રહી છે. જાગૃત વ્યક્તિના આ પગલાથી યુનિવર્સિટી કેમ્પસમાં ચાલતી આવી અનૈતિક પ્રવૃત્તિઓનો પર્દાફાશ થયો છે.
