વડોદરા જિલ્લામાં સંગઠિત ગુનાખોરીને ડામવા માટે પોલીસે કડક કાર્યવાહીના ભાગરૂપે કુખ્યાત બુટલેગર રાકેશ જયસ્વાલ અને તેના પરિવાર સામે ગુજસીટોક (Gujarat Control of Terrorism and Organised Crime Act) હેઠળ ગુનો નોંધીને ધરપકડ કરી છે. વરણામા પોલીસે રાકેશ જયસ્વાલ ઉપરાંત તેના પરિવારના સભ્યો હિતેશ જયસ્વાલ, સચિન જયસ્વાલ, સીમા જયસ્વાલ અને રાજેશ બારીયા સામે પણ કાર્યવાહી કરી છે. ગુજસીટોક હેઠળ ગુનો નોંધાતા આ આરોપીઓને સરળતાથી જામીન મળી શકશે નહીં, જે બુટલેગરો માટે એક મોટો ફટકો છે.
અનેક ગંભીર ગુનાઓ નોંધાયેલા, આંતરરાજ્ય નેટવર્ક
આરોપી રાકેશ જયસ્વાલ અને તેના પરિવારના સભ્યો સામે માત્ર દારૂના ધંધાના જ નહીં, પરંતુ હત્યાના પ્રયાસ, મારામારી અને ખંડણી જેવા અનેક ગંભીર ગુનાઓ અગાઉથી નોંધાયેલા છે. પોલીસ તપાસમાં ખુલાસો થયો છે કે આ બુટલેગર ગેંગ પંજાબ, હરિયાણા અને રાજસ્થાન જેવા અન્ય રાજ્યોમાંથી દારૂ મંગાવીને વડોદરા સહિત ગુજરાતના અન્ય વિસ્તારોમાં સપ્લાય કરતી હતી. આ આંતરરાજ્ય નેટવર્કના કારણે જ તેમણે સંગઠિત ગુનાખોરીની વ્યાખ્યામાં આવતા ગુનાઓ આચર્યા હતા.
