Vadodara News : વડોદરામાં કરોડોના ઓટો પાર્ટ્સની હેરાફેરીનો પર્દાફાશ, ટ્રક ચાલક-ક્લિનર ઝડપાયા

વડોદરા પોલીસે ઓટો પાર્ટ્સની ગેરકાયદેસર હેરાફેરીના એક મોટા કૌભાંડનો પર્દાફાશ કર્યો છે. ભરથાણા ટોલનાકા નજીકથી શંકાસ્પદ ટ્રકને ઝડપી પાડીને પોલીસે તેમાંથી આશરે રૂપિયા 1.6 કરોડનો ઓટો પાર્ટ્સનો જથ્થો જપ્ત કર્યો છે. આ મામલે ટ્રક ચાલક અને ક્લિનરની અટકાયત કરીને વધુ પૂછપરછ હાથ ધરવામાં આવી છે.

પોલીસને મળી મોટી સફળતા

મળતી જાણકારી અનુસાર, વડોદરા પોલીસને બાતમી મળી હતી કે, એક ટ્રકમાં મોટા પાયે ઓટો પાર્ટ્સનો સમાન કોઈપણ કાયદેસરના પુરાવા વિના લઇ જવામાં આવી રહ્યો છે. આ બાતમીના આધારે પોલીસે ભરથાણા ટોલનાકા નજીક વોચ ગોઠવી હતી. થોડા સમય બાદ શંકાસ્પદ ટ્રક ત્યાંથી પસાર થતાં તેને રોકવામાં આવી હતી. પોલીસે ટ્રકમાં તપાસ કરતાં તમાંથી મોટી માત્રામાં ઓટો પાર્ટ્સનો સમાન મળી આવ્યો હતો.

રૂપિયા 1.6 કરોડનો મુદ્દામાલ જપ્ત

મહત્વનું છે કે, પોલીસે ટ્રક ચાલક પાસે આ માલને લગતા દસ્તાવેજોની માંગણી કરતાં તે કોઈ સંતોષકારક જવાબ આપી શક્યો ન હતો અને કોઈપણ કાયદેસરના પુરાવા રજૂ કરી શક્યો ન હતો. આથી, પોલીસે તાત્કાલિક ધોરણે ટ્રક અને તેમાંથી મળી આવેલા રૂપિયા 1.6 કરોડનો મુદ્દામાલ જપ્ત કરી લીધો હતો. પોલીસે આ મામલે ટ્રક ચાલક અને તેની સાથે રહેલા ક્લિનર બંનેની અટકાયત કરી છે. તેમની પ્રાથમિક પૂછપરછમાં માલ ક્યાંથી આવ્યો હતો અને ક્યાં લઈ જવામાં આવી રહ્યો હતો તે અંગેની માહિતી મેળવવાનો પ્રયાસ થઈ રહ્યો છે. પોલીસને શંકા છે કે આ માલ ચોરીનો હોઈ શકે છે અથવા કરચોરીના ઈરાદે તેની હેરાફેરી કરવામાં આવી રહી હતી.