Dwarkaમાં 22 વર્ષીય યુવતીએ લગાવી મોતની છલાંગ, સીસીટીવી ફૂટેજ આવ્યા સામે

દેવભૂમિ દ્વારકા જિલ્લાના ભાણવડ નજીક આવેલી ત્રિવેણી નદીમાં એક ચોંકાવનારી ઘટના બની છે. જ્યાં એક યુવતીએ નદીમાં ઝંપલાવીને આત્મહત્યા કરી હોવાનું સામે આવ્યું છે. આ સમગ્ર ઘટનાના સીસીટીવી ફૂટેજ પણ પ્રકાશમાં આવ્યા છે. જેણે ભારે ચકચાર જગાવી છે. યુવતીનું નામ શીતલબેન નોવધણભાઈ બેરા છે. સીસીટીવી ફૂટેજમાં સ્પષ્ટ જોઈ શકાય છે કે સવારે 9 વાગ્યાની આસપાસ આ 22 વર્ષની યુવતી ત્રિવેણી નદીના પુલ પરથી પાણીમાં કૂદી પડી હતી.

યુવતીએ નદીમાં ઝંપલાવી આત્મહત્યા કર્યાની ચર્ચા

આ ઘટનાને પગલે આસપાસના લોકોમાં ગભરાટ ફેલાયો હતો. એવું પણ અનુમાન લગાવવામાં આવી રહ્યું છે કે યુવતીએ નદીમાં ઝંપલાવતા પહેલાં કોઈ ઝેરી પદાર્થનું સેવન કર્યું હોય. આ બાબતની પુષ્ટિ હાલમાં થઈ નથી પરંતુ તેની તપાસ ચાલી રહી છે. ઘટનાની જાણ થતાં જ ખંભાળિયા ફાયર સેફ્ટીની ટીમ તાત્કાલિક સ્થળ પર પહોંચી ગઈ હતી. ફાયર વિભાગ દ્વારા યુવતીને શોધવા માટે યુદ્ધના ધોરણે શોધખોળ શરૂ કરવામાં આવી છે.

ફાયર વિભાગની ટીમે યુવતીની શોધખોળ હાથ ધરી

નદીના ઊંડાણ અને પ્રવાહને કારણે શોધખોળમાં મુશ્કેલીઓનો સામનો કરવો પડી રહ્યો છે. પોલીસે પણ આ ઘટનાની નોંધ લીધી છે અને યુવતીના પરિવારનો સંપર્ક કરીને વધુ વિગતો મેળવવાનો પ્રયાસ કરી રહી છે. આત્મહત્યા પાછળનું કારણ શું છે તે હજુ સુધી જાણી શકાયું નથી. આ કરુણ ઘટનાએ ફરી એકવાર યુવાનોના માનસિક સ્વાસ્થ્ય અને જીવન પ્રત્યેના તેમના અભિગમ પર ગંભીર સવાલો ઊભા કર્યા છે.