દ્વારકા જિલ્લામાં સોશિયલ મીડિયાના માધ્યમથી છેતરપિંડી આચરનારા એક શખ્સને સાયબર પોલીસે રાજકોટથી ઝડપી પાડ્યો હતો. આ આરોપી નકલી આઈડી બનાવીને બ્રાન્ડેડ વસ્તુઓ સસ્તા ભાવે વેચવાની જાહેરાત કરતો હતો. આવી જાહેરાત કરી તે લોકોને લલચાવીને તેમની પાસેથી ઓનલાઈન રૂપિયા ખંખેરી લેતો હતો. આરોપીએ દ્વારકાના એક ફરિયાદીને સસ્તા ભાવે આઇફોન વેચવાની લાલચ આપી હતી. મોબાઈલ ફોનની લાલચ આપીને ફરિયાદી પાસેથી ઓનલાઈન રૂ.26,500 પડાવી લીધા હતા.


રાજકોટના રિંગ રોડ પર રહેતા જયેશ વિઠલ ઝાલાની કરી ધરપકડ 

Also Read

ફરિયાદીએ આ મામલે સાયબર પોલીસમાં ફરિયાદ નોંધાવતા પોલીસે તાત્કાલિક કાર્યવાહી હાથ ધરી હતી. ટેકનિકલ સર્વેલન્સ અને અન્ય પુરાવાના આધારે પોલીસે આરોપીની ધરપકકડ કરી હતી. પોલીસે રાજકોટના રિંગ રોડ પર રહેતા અને ખાનગી નોકરી કરતા જયેશ વિઠલ ઝાલા નામના આરોપીની ધરપકડ કરી હતી. જયેશ ઝાલાનો ગુનાહિત ઇતિહાસ તપાસતા પોલીસને જાણવા મળ્યું હતું કે તે ગુજરાતમાં આવા જ અન્ય 6 ગુનાઓમાં પણ સંડોવાયેલો હતો.

આરોપી પાસેથી રૂ.70,500ની કિંમતના 4 મોબાઈલ ફોન કર્યા જપ્ત

આ ધરપકડથી ઓનલાઇન છેતરપિંડીના અનેક કેસોનો ભેદ ઉકેલાય તેવી શક્યતા છે. સાયબર પોલીસે આરોપી જયેશ ઝાલા પાસેથી રૂ.70,500ની કિંમતના 4 મોબાઈલ ફોન પણ જપ્ત કર્યા હતા. આ મોબાઈલ ફોનનો ઉપયોગ તે છેતરપિંડી આચરવા માટે કરતો હોવાનું મનાઈ રહ્યું છે. પોલીસે આરોપી વિરુદ્ધ કાયદેસરની કાર્યવાહી હાથ ધરી હતી. તેમજ આરોપીની વધુ પૂછપરછ હાથ ધરવામાં આવી હતી. આ ઘટના ફરી એકવાર ઓનલાઈન ખરીદી કરતી વખતે સાવચેત રહેવા બાબતે ધ્યાન દોરે છે.

  • Follow us on: