Dwarkaમાં ભારે પવન અને ગાજવીજ સાથે ધોધમાર વરસાદ વરસ્યો, મેઘરાજાની તોફાની એન્ટ્રીથી જનજીવન થયું પ્રભાવિત

દેવભૂમિ દ્વારકા જિલ્લામાં આજે મેઘરાજાએ તોફાની એન્ટ્રી કરી છે. ભારે પવન અને ગાજવીજ સાથે ધોધમાર વરસાદ વરસતા સમગ્ર પંથકમાં જળબંબાકારની સ્થિતિ સર્જાઈ હતી. ખાસ કરીને યાત્રાધામ દ્વારકામાં વરસાદનું જોર એટલું હતું કે શહેરના નીચાણવાળા વિસ્તારોમાં પાણી ભરાઈ ગયા હતા. જેના કારણે જનજીવન પ્રભાવિત થયું હતું. વરસાદ શરૂ થતાની સાથે જ ઈસ્કોન ગેટ, ભદ્રકાળી ચોક, રેલવે સ્ટેશન રોડ સહિતના વિસ્તારોમાં રસ્તાઓ પર નદીની જેમ પાણી વહેતા થયા હતા.

જગત મંદિરના પગથિયા પરથી પાણી વહેતા થયા

સ્થિતિ એવી હતી કે વાહનચાલકો અને રાહદારીઓને ભારે મુશ્કેલીનો સામનો કરવો પડ્યો હતો. આ ધોધમાર વરસાદને કારણે પ્રવાસીઓ અને ભક્તોને પણ થોડા સમય માટે મુશ્કેલી પડી હતી. આ વરસાદ દરમિયાન ભગવાન દ્વારકાધીશના જગત મંદિરના પગથિયાં પરથી પણ પાણી વહેવાનો અલભ્ય નજારો જોવા મળ્યો હતો. જેને જોવા માટે લોકો ઉમટી પડ્યા હતા. આ દૃશ્ય જાણે કે ખુદ મેઘરાજા ભગવાન દ્વારકાધીશને અભિષેક કરી રહ્યા હોય તેવું લાગી રહ્યું હતું.

વીજળીના કડાકા સાથે દ્વારકામાં ધોધમાર વરસાદ

દ્વારકા શહેર ઉપરાંત જામ કલ્યાણપુર અને લાંબા ગામ સહિત આસપાસના ગ્રામ્ય વિસ્તારોમાં પણ ભારે વરસાદ પડ્યો હતો. આ વરસાદથી ખેડૂતોમાં ખુશીનો માહોલ છવાયો હતો. કારણ કે આ વરસાદના કારણે ખેતરોમાં પાણી ભરાઈ જવાથી પાકને નવજીવન આપશે. લાંબા સમયના વિરામ બાદ પડેલા આ વરસાદથી નદી-નાળા અને ચેકડેમોમાં પણ પાણીની નવી આવક થઈ હતી. આમ દ્વારકામાં મેઘરાજાની પધરામણી ભક્તો અને ખેડૂતો બંને માટે આનંદદાયક રહી છે.