ગાંધીનગરમાં ગુજરાતના ધારાસભ્યો માટે નવનિર્મિત આધુનિક સદસ્ય નિવાસમાં આખરે મકાનોની ફાળવણી કરવામાં આવી છે. આ નવું નિવાસસ્થાન ભાઈબીજના શુભ દિવસે જ લોકાર્પિત કરવામાં આવ્યું હતું, અને હવે કુલ 150 ધારાસભ્યોને ફ્લેટની ફાળવણીની પ્રક્રિયા પૂર્ણ કરવામાં આવી છે. આ ફાળવણીમાં ખાસ ધ્યાન રાખવામાં આવ્યું છે કે ધારાસભ્યોને તેમના વિસ્તાર અને જરૂરિયાત પ્રમાણે રહેઠાણ મળી રહે. મંત્રીઓ, મુખ્ય દંડક અને ઉપ દંડક જેવા મહત્ત્વના પદાધિકારીઓને પરંપરા મુજબ મંત્રી નિવાસમાં બંગલા ફાળવવામાં આવ્યા છે, જ્યારે અન્ય ધારાસભ્યોને આ નવા સદસ્ય નિવાસમાં ફ્લેટ ફાળવવામાં આવ્યા છે.
વિસ્તાર અને મહિલાઓ માટે ખાસ બ્લોક ફાળવણી
આ ફાળવણી પ્રક્રિયામાં અમુક મહત્ત્વપૂર્ણ નિર્ણયો લેવામાં આવ્યા છે. સૌથી મહત્ત્વનો નિર્ણય એ છે કે રાજ્યના તમામ મહિલા ધારાસભ્યોને એકસાથે બ્લોક 6 ફાળવવામાં આવ્યો છે. આનાથી મહિલા ધારાસભ્યોની સલામતી અને સગવડમાં વધારો થશે. આ ઉપરાંત, ભૌગોલિક વિસ્તારના આધારે પણ ફ્લેટની ફાળવણી કરવામાં આવી છે. ઉદાહરણ તરીકે, દૂરના વિસ્તારો જેવા કે કચ્છ, બનાસકાંઠા, અને પાટણના MLAને ગાંધીનગરના ધારાસભ્યોની સાથે બ્લોક 1 માં ફાળવણી કરવામાં આવી છે. જ્યારે અમદાવાદ શહેર અને જિલ્લાના ધારાસભ્યોને બ્લોક 2 ફાળવવામાં આવ્યો છે, જેથી તેઓ એકબીજાની નજીક રહી શકે અને સંકલન જાળવી શકે.
