છેલ્લા ચાર દિવસથી ચાલી રહેલી સસ્તા અનાજના દુકાનધારકો (વિતરકો)ની હડતાળ આખરે સમેટાઈ ગઈ છે. અન્ન અને નાગરિક પુરવઠા વિભાગના મંત્રી સાથે વિતરક એસોસિયેશનના આગેવાનોની બેઠક બાદ આ અંગે સકારાત્મક સમાધાન થયું છે. વેપારીઓએ જણાવ્યું હતું કે, "અમારી માંગણીઓ પર સાનુકુળ પ્રતિભાવ આપવામાં આવ્યો છે," જેના પગલે તેમણે તાત્કાલિક અસરથી હડતાળ પાછી ખેંચી લીધી છે. હડતાળ સમેટાઈ જતાં રાજ્યના લાખો ગરીબ અને મધ્યમ વર્ગના ગ્રાહકોને મોટી રાહત મળી છે, જેઓ છેલ્લા ચાર દિવસથી રેશનિંગ અનાજ મેળવવાથી વંચિત હતા.
મુખ્ય માગણીઓ પર સરકારનું હકારાત્મક વલણ
વિતરકોની સૌથી મહત્ત્વની માગણી, એટલે કે તેમના કમિશનમાં વધારો કરવાની બાબત પર સરકારે હકારાત્મક વલણ અપનાવ્યું છે. સરકારે ખાતરી આપી છે કે કમિશન વધારવાની દરખાસ્તને ત્વરિત ધોરણે નાણા વિભાગને મંજૂરી માટે મોકલી આપવામાં આવશે. આ ઉપરાંત, વિતરકોની અન્ય એક સમસ્યા, બાયોમેટ્રિક પ્રક્રિયામાં જથ્થો ઉતારવા સંબંધિત હતી. આ અંગે પણ વહીવટી સરળતા લાવતા નિર્ણય લેવાયો છે કે, હવેથી રેશનિંગનો જથ્થો ઉતારતી વખતે 2 સભ્યોની સહીથી બાયોમેટ્રિક પ્રક્રિયા પૂર્ણ કરી શકાશે.
