ગુજરાતની કફ સીરપમાં ઝેરી પદાર્થ ડાયથિલીન ગ્લાઇકોલ (DEG) મળવાના ગંભીર મામલા બાદ રાજ્ય સરકાર સંપૂર્ણપણે એલર્ટ મોડ પર આવી ગઈ છે. આ ઘટનાને પગલે સરકારે તાત્કાલિક ધોરણે પગલાં લીધા છે અને ઝેરી સીરપનું ઉત્પાદન કરતી સુરેન્દ્રનગર અને બાવળા સ્થિત બે કંપનીઓ પર પ્રતિબંધ મૂકી દીધો છે. પ્રતિબંધ મૂકાયેલી આ કંપનીઓમાં શેપ ફાર્મા (Shape Pharma) અને રેડનેક્ષ ફાર્માસ્યુટીકલ (Rednex Pharmaceutical)નો સમાવેશ થાય છે. સરકારે આ બંને કંપનીઓમાંથી માત્ર કફ સીરપ જ નહીં, પરંતુ તેમની અન્ય બાળકોની દવાઓ સહિતનો તમામ જથ્થો પણ તાત્કાલિક ધોરણે જપ્ત કરી લીધો છે અને બજારમાંથી વેચાયેલો જથ્થો પરત મંગાવી લેવામાં આવ્યો છે.
આરોગ્ય મંત્રી ઋષિકેશ પટેલનું મોટું નિવેદન
સમગ્ર કફ સીરપકાંડની ગંભીરતાને ધ્યાનમાં રાખીને રાજ્યના આરોગ્ય મંત્રી ઋષિકેશ પટેલે મહત્વનું નિવેદન આપ્યું છે. તેમણે જણાવ્યું કે, શેપ ફાર્મા કંપનીમાં તપાસ શરૂ કરી દેવામાં આવી છે અને સમગ્ર મામલે તપાસ કરવામાં આવી રહી છે. મંત્રીએ ખુલાસો કર્યો કે રાજ્યમાં આવી ઓરલ દવાઓ બનાવતી 624 જેટલી પેઢીઓ છે, અને સરકાર તમામ દવાઓની ગુણવત્તા તપાસ કરાવશે. આરોગ્ય મંત્રીએ ઉમેર્યું હતું કે કફ સીરપ સિવાયની બાળકો માટેની અન્ય ઓરલ મેડિસિનની પણ તપાસ કરવામાં આવી રહી છે. ભવિષ્યમાં આવા બનાવો ન બને તે માટે પ્રત્યેક બેચનું સઘન મોનિટરિંગ કરવામાં આવે છે.
