ગુજરાત રાજ્ય સરકારે આગામી વર્ષ 2026-27 ના વાર્ષિક બજેટની તૈયારીઓનું વિધિવત પ્રારંભ કરી દીધું છે. રાજ્યના નાણાં વિભાગે આ અંગે એક 52 પાનાનો વિગતવાર પત્ર તમામ વિભાગોને મોકલીને બજેટની કામગીરી શરૂ કરવા માટે સૂચનાઓ આપી છે. આ પ્રક્રિયાના ભાગરૂપે દરેક વિભાગે તેમની આવક અને ખર્ચના અંદાજોને નિયત સમય મર્યાદામાં નાણાં વિભાગ સમક્ષ રજૂ કરવાના રહેશે. બજેટની તૈયારીઓ વહેલી શરૂ કરવા પાછળનો હેતુ નાણાકીય આયોજનને વધુ સુવ્યવસ્થિત અને અસરકારક બનાવવાનો છે.
આવક-ખર્ચના અંદાજો માટે કડક ડેડલાઇન
નાણાં વિભાગ દ્વારા તમામ સરકારી વિભાગોને કડક સમય મર્યાદા આપવામાં આવી છે. વિભાગોએ તેમના આવક અને ખર્ચના અંદાજો આગામી 15 ઓક્ટોબર સુધીમાં રજૂ કરવા પડશે. આ ઉપરાંત, વિભાગોએ વર્ષ 2025-26 માટેના સુધારેલા મહેસૂલી અને મૂડી ખર્ચના અંદાજો પણ 15 ડિસેમ્બર સુધીમાં સોંપવાના રહેશે. નાણાં વિભાગે સ્પષ્ટ સૂચના આપી છે કે નિયત સમય મર્યાદામાં જ તમામ માહિતી પૂરી પાડવામાં આવે, જેથી સમગ્ર બજેટ પ્રક્રિયા સમયસર અને ભૂલમુક્ત રીતે પૂર્ણ થઈ શકે.
