ગુજરાત સરકારના મહેસૂલ વિભાગ દ્વારા વહીવટી પ્રક્રિયાને વધુ વેગવંતી અને સુદ્રઢ બનાવવાના ભાગરૂપે એક મોટો નિર્ણય લેવામાં આવ્યો છે. રાજ્યના મહેસૂલ વિભાગ દ્વારા વર્ગ 3 સંવર્ગના કર્મચારીઓની મોટા પાયે જિલ્લા ફેરબદલી કરવાનો સત્તાવાર આદેશ જાહેર કરવામાં આવ્યો છે. આ નવા સરકારી આદેશ અનુસાર મહેસૂલ વિભાગ હેઠળ ફરજ બજાવતા અલગ-અલગ જિલ્લાના કુલ 71 જેટલા કર્મચારીઓની એકસાથે બદલી કરી દેવામાં આવી છે.
ગાંધીનગર, અમદાવાદ અને સુરતમાં સૌથી વધુ પોસ્ટિંગ
મહેસૂલ વિભાગ દ્વારા જાહેર કરવામાં આવેલા બદલીના આ લિસ્ટમાં રાજ્યના મુખ્ય શહેરો પર વિશેષ ધ્યાન કેન્દ્રિત કરવામાં આવ્યું હોય તેમ લાગી રહ્યું છે. બદલી પામેલા 71 કર્મચારીઓમાંથી સૌથી વધારે કર્મચારીઓને ગાંધીનગર, અમદાવાદ અને સુરત જિલ્લામાં નવું પોસ્ટિંગ આપવામાં આવ્યું છે. વહીવટી કામગીરીના ભારણને હળવું કરવા અને સરકારી કામકાજમાં વધુ પારદર્શિતા લાવવા માટે આ મહત્વના શહેરોમાં ખાલી પડેલી જગ્યાઓ પર નવા કર્મચારીઓની નિમણૂક કરવામાં આવી છે.
