Junagadhના ડુંગરપુરમાં રહેણાંક વિસ્તારમાં ઝરખ દેખાતા લોકોમાં ભયનો માહોલ સર્જાયો

જુનાગઢ શહેરના ડુંગરપુર વિસ્તારમાં ફરી એકવાર વન્ય પ્રાણીના આંટાફેરાથી લોકોમાં ગભરાટ ફેલાયો છે. થોડા સમય પહેલા અહીં સિંહ જોવા મળ્યા બાદ હવે એક ખૂંખાર પ્રાણી ઝરખ જોવા મળ્યું હતું. જેના કારણે સ્થાનિકોમાં ભયનો માહોલ ભેલાયો હતો. ઝરખના આંટાફેરા સીસીટીવી કેમેરામાં કેદ થયા હતા અને આ વિડીયો સોશિયલ મીડિયા પર વાયરલ થયો હતો. ડુંગરપુર વિસ્તારમાં આવેલી એક સિમેન્ટ ફેક્ટરી નજીક ઝરખની અવરજવર જોવા મળી હતી.

ડુંગરપુર પાસે ઝરખની અવરજવર

ઝરખ રાત્રિના સમયે ફેક્ટરી અને આસપાસના વિસ્તારોમાં આંટાફેરા મારતું હોવાનું સીસીટીવી ફૂટેજમાં સ્પષ્ટ દેખાઈ રહ્યું હતું. આ વિડીયો વાયરલ થતા ડુંગરપુર અને આસપાસના વિસ્તારોના રહેવાસીઓમાં ફફડાટ વ્યાપી ગયો હતો. સ્થાનિકોનું કહેવું હતું કે આ વિસ્તાર ગિરનારના જંગલની નજીક હોવાથી વન્ય પ્રાણીઓ ઘણીવાર ખોરાકની શોધમાં રહેણાંક વિસ્તારો સુધી પહોંચી જાતા હોય છે. અઠવાડિયા પહેલા પણ અહીંથી સિંહનો વિડીયો વાયરલ થયો હતો. જેનાથી લોકોમાં પહેલેથી જ ચિંતા હતી. હવે ઝરખ જોવા મળતા ભય વધુ વધી ગયો હતો.

ઝરખના આંટાફેરાથી સ્થાનિકોમાં ભયનો માહોલ

ઝરખ સામાન્ય રીતે શિકારી અને માંસાહારી પ્રાણી હોય છે. જે માણસો માટે જોખમી સાબિત થઈ શકે છે. ત્યાર બાદ સ્થાનિકો દ્વારા આ સમગ્ર ઘટના અંગે વન વિભાગને જાણ કરવામાં આવી હતી. વન વિભાગ દ્વારા આ વિસ્તારમાં પેટ્રોલીંગ વધારવામાં આવે અને વન્ય પ્રાણીઓ ફરી રહેણાંક વિસ્તારમાં ન આવે તે માટે પગલાં ભરવામાં આવે તેવી સ્થાનિકો દ્વારા માગ કરવામાં આવી હતી. લોકોએ પોતાના બાળકો અને પાલતુ પ્રાણીઓની સલામતી માટે પણ ચિંતા વ્યક્ત કરી હતી. વન વિભાગે લોકોને અંધારામાં એકલા બહાર ન નીકળવા તેમજ સાવચેત રહેવા પણ અપીલ કરી હતી.