Junagadhમાં રી-કન્સ્ટ્રક્શન માટે ગયેલી LCBની ટીમ લિફ્ટમાં ફસાઈ, ટેકનિકલ ખામી સર્જાતા લિફ્ટ ખોટકાઈ હતી

જૂનાગઢમાં આજે એક વિચિત્ર ઘટના બની હતી. જેમાં જૂનાગઢ લોકલ ક્રાઈમ બ્રાન્ચની ટીમ આરોપી સાથે ઘટનાનું રી-કન્સ્ટ્રક્શન કરાવવા માટે ગઈ હતી. ત્યારે ટેકનિકલ ખામી સર્જાતા લિફ્ટમાં ફસાઈ ગઈ હતી. આ ઘટનાને પગલે પોલીસ અને સ્થાનિક લોકોમાં ભારે નાસભાગ મચી ગઈ હતી. LCBની ટીમ એક આરોપીને લઈને કોઈ ગુનાનું રી-કન્સ્ટ્રક્શન કરાવવા માટે એક બિલ્ડિંગમાં ગઈ હતી.

રી-કન્ટ્રક્શન માટે ગયેલી ટીમ લિફ્ટમાં ફસાઇ

આ ટીમમાં કુલ છ જેટલા પોલીસ કર્મચારીઓ હતા. તેઓ લિફ્ટમાં ચડીને ઉપર જઈ રહ્યા હતા ત્યારે અચાનક લિફ્ટમાં ટેકનિકલ ખામી સર્જાતા તે અધવચ્ચે જ અટકી પડી હતી. લિફ્ટ અટકી પડતા અંદર ફસાયેલા પોલીસ કર્મચારીઓએ બચાવ માટે બૂમાબૂમ કરી હતી. પોલીસ ટીમના ફસાઈ જવાની જાણ થતા જ તેમને બહાર કાઢવાના પ્રયત્નો હાથ દરવામાં આવ્યા હતા.

લિફ્ટમાં ટેકનિકલ ખામી સર્જાતા બંધ પડી

સ્થાનિક લોકોએ તાત્કાલિક ઘટનાસ્થળે દોડી આવ્યા હતા. લોકોએ મહામુસીબતે અને ભારે જહેમત બાદ લિફ્ટને ખોલી હતી અને અંદર ફસાયેલા તમામ છ પોલીસ કર્મચારીઓને હેમખેમ બહાર કાઢ્યા હતા. સદ્નસીબે આ સમગ્ર ઘટનામાં કોઈને ઈજા પહોંચી નહોતી. પરંતુ આ ઘટના પોલીસની કામગીરી દરમિયાન સર્જાયેલી એક અણધારી મુશ્કેલી હતી. આ ઘટના બાદ પોલીસ ટીમે પોતાની કામગીરી ફરીથી શરૂ કરી હતી.