Junagadhના ભેંસાણમાં જનતા રેડ, ખુલ્લેઆમ થતાં દેશી દારૂના વેચાણનો લોકોએ કર્યો પર્દાફાશ

જૂનાગઢ જિલ્લાના ભેંસાણ તાલુકામાં કાયદાનો ડર ઓગળી ગયો હોય તેવો કિસ્સો સામે આવ્યો છે. જ્યાં ખુલ્લેઆમ દેશી દારૂનું વેચાણ થતા રોષે ભરાયેલા લોકોએ જાતે જ જનતા રેડ પાડીને પોલીસની બેદરકારીનો પર્દાફાશ કર્યો છે. આ ઘટનાનો વીડિયો સોશિયલ મીડિયા પર વાયરલ થતાં સમગ્ર વિસ્તારમાં ભારે ચકચાર મચી ગયો છે.

ભેસાણ તાલુકામાં દારૂના ધંધાર્થીઓ બન્યા બેફામ

ભેંસાણ તાલુકામાં દારૂના ધંધાર્થીઓ બેફામ બન્યા છે. સ્થાનિક લોકોએ આ અંગે પોલીસને અનેકવાર રજૂઆત કરી હોવા છતાં કોઈ કાર્યવાહી કરવામાં આવતી નહોતી. આખરે કંટાળીને લોકોએ જાતે જ હોસ્પિટલ નજીક ચેકિંગ શરૂ કર્યું હતું. આ દરમિયાન એક શખ્સ બાઇક પર દારૂની ડિલિવરી કરવા જઈ રહ્યો હતો. ત્યારે લોકોએ તેને રોકીને તપાસ કરી હતી. તપાસ કરતા બાઇકમાંથી દેશી દારૂની કોથળીઓનો મોટો જથ્થો મળી આવ્યો હતો. લોકોએ આ સમગ્ર ઘટનાનો વીડિયો બનાવીને સોશિયલ મીડિયા પર વાયરલ કર્યો હતો.

લોકોએ જનતા રેડ પાડીને પોલીસની બેદરકારીનો કર્યો પર્દાફાશ

જેણે પોલીસની કામગીરી પર ગંભીર સવાલો ઊભા કર્યા છે. વીડિયોમાં લોકો પોલીસને પ્રશ્ન કરતા જોવા મળે છે કે દારૂબંધી હોવા છતાં આ પ્રવૃત્તિ કેવી રીતે ચાલી રહી છે. આ ઘટનાએ માત્ર ભેંસાણ જ નહીં પરંતુ સમગ્ર વિસ્તારમાં પોલીસની કાર્યશૈલી અને જવાબદારી પર પ્રશ્નો ઊભા કર્યા છે. અગાઉ મેંદરડામાં પણ દેશી દારૂનું વેચાણ થતા હોવાના વીડિયો વાયરલ થયા હતા. લોકોની માંગ છે કે તંત્ર દ્વારા આ મામલે કડક પગલાં લેવામાં આવે અને જવાબદાર પોલીસકર્મીઓ સામે પણ કાર્યવાહી થાય.