Junagadhના પાતાપુરમાં ફરી સાવજો લટાર મારવા નીકળ્યા, સિમેન્ટ ઇન્ડસ્ટ્રીઝ નજીક ત્રણ સિંહ CCTVમાં થયા કેદ

જૂનાગઢ જિલ્લાના પાતાપુર ગામની સીમમાં આવેલા સિમેન્ટ ઇન્ડસ્ટ્રીઝ નજીક ફરી એકવાર સિંહના આંટાફેરા જોવા મળ્યા હતા. મોડી રાત્રે ત્રણ સિંહ લટાર મારતા સીસીટીવી કેમેરામાં કેદ થયા હતા. જેના કારણે આસપાસના ગ્રામજનો અને ઉદ્યોગના કર્મચારીઓમાં ફરી એકવાર ભયનો માહોલ ફેલાયો હતો. આ ઘટના ગત મોડી રાત્રિ દરમિયાન બની હતી. સીસીટીવી ફૂટેજમાં સ્પષ્ટપણે જોઈ શકાય છે કે ત્રણ સિંહ શાંતિથી સિમેન્ટ ઇન્ડસ્ટ્રીઝની આસપાસના વિસ્તારમાં ફરી રહ્યા હતા.

મોડી રાત્રે ત્રણ સિંહની લટાર સીસીટીવીમાં કેદ

આ જ વિસ્તારમાં થોડા સમય પહેલા પણ સિંહ જોવા મળ્યા હતા. અગાઉ સિંહ અને એક કર્મચારી અચાનક આમને-સામને પણ આવી ગયા હતા. જેના કારણે બંને ગભરાઈને ભાગ્યા હતા. જંગલ વિસ્તારની નજીક આવેલા આ ગામોમાં વન્ય પ્રાણીઓની અવરજવર હવે સામાન્ય બની રહી છે. જોકે સિંહ જેવા હિંસક પ્રાણીઓના ગામની નજીક આવવાથી લોકોની સુરક્ષા સામે સવાલો ઉભા થયા હતા. ખાસ કરીને રાત્રિના સમયે ખેતરોમાં જતા ખેડૂતો અને ફેક્ટરીમાં કામ કરતા કર્મચારીઓમાં ભયનો માહોલ ફેલાયો હતો.

વન્ય પ્રાણીઓની અવરજવરથી લોકોમાં ભય

આ સીસીટીવી ફૂટેજ સામે આવ્યા બાદ સ્થાનિકોએ વન વિભાગને જાણ કરી હતી અને આ મામલે યોગ્ય કાર્યવાહી કરવાની માગ કરી હતી. લોકોની માગ હતી કે વન વિભાગ દ્વારા આ વિસ્તારમાં પેટ્રોલિંગ વધારવામાં આવે અને સિંહ ગામમાં ન પ્રવેશે તે માટે જરૂરી પગલાં લેવામાં આવે. આ ઘટનાએ ફરી એકવાર માનવ-વન્યજીવ સંઘર્ષની સમસ્યાને ઉજાગર કરી છે.