દ્વારકા જિલ્લાના જામ ખંભાળીયા પંથકમાં લાંબા સમયના વિરામ બાદ મોડી રાત્રે મેઘરાજાએ મહેર વરસાવી છે. ભારે પવન અને વીજળીના કડાકા-ભડાકા સાથે ધોધમાર વરસાદ વરસતા વાતાવરણમાં ઠંડક પ્રસરી ગઈ છે અને લોકોએ ગરમી તથા ઉકળાટમાંથી રાહતનો અનુભવ કર્યો છે. છેલ્લા ઘણા દિવસોથી ખંભાળીયા પંથકમાં વરસાદે વિરામ લીધો હતો. જેના કારણે ગરમી અને બફારાનું પ્રમાણ ખૂબ જ વધી ગયું હતું. લોકો આતુરતાપૂર્વક વરસાદની રાહ જોઈ રહ્યા હતા.
ભારે પવન સાથે ધોધમાર વરસાદ ખાબક્યો
મોડી રાત્રે અચાનક વાતાવરણમાં પલટો આવ્યો અને આકાશ કાળા ડિબાંગ વાદળોથી ઘેરાઈ ગયું. થોડા જ સમયમાં ભારે પવન સાથે વરસાદનું આગમન થયું અને જોતજોતામાં ધોધમાર વરસાદ શરૂ થયો. ભારે વરસાદના કારણે ખંભાળીયા શહેરના મુખ્ય માર્ગો પર વરસાદી પાણી વહેતા થયા હતા. શહેરના નીચાણવાળા વિસ્તારો જેવા કે નગરનાકા અને રામનાથ સોસાયટીમાં પાણી ભરાઈ ગયા હતા. જેના કારણે વાહનચાલકોને મુશ્કેલીનો સામનો કરવો પડ્યો હતો.
