Khedaના માતર તાલુકામાં લાંબા વિરામ બાદ વરસાદનું આગમન થતા ખેડૂતોમાં છવાયો ખુશીનો માહોલ

ખેડા જિલ્લાના માતર તાલુકામાં લાંબા વિરામ બાદ વરસાદનું આગમન થયું હતું. જેના કારણે ખેડૂતોમાં ખુશીનો માહોલ છવાઈ ગયો હતો. માતર અને લીંબાસી સહિતના પંથકમાં વરસાદ વરસતા ખેડૂતોના સુકાઈ રહેલા પાકને નવજીવન મળ્યું હતું. ચોમાસાની શરૂઆતમાં વરસાદ પડ્યા બાદ લાંબા સમયથી વરસાદે વિરામ લઈ લીધો હતો. જેના કારણે ખેડૂતો ભારે ચિંતામાં મુકાયા હતા. તેમના વાવેલા પાકને પાણીની તાતી જરૂરિયાત હતી અને પાક સુકાઈ રહ્યો હતો.

વરસાદ પડતા ખેડૂતોએ રાહત અનુભવી

આવી પરિસ્થિતિમાં વરસાદનું આગમન થતાં ખેડૂતોમાં ફરી એકવાર પાક સારો થવાની આશા જાગી હતી. માતર તેમજ લીંબાસી, શેખપુર, સાયલા, ત્રાજ, પરીયેજ સહિતના અનેક ગામોમાં પણ વરસાદ વરસ્યો હતો. ક્યાંક ધીમીધારે તો ક્યાંક ધોધમાર વરસાદ પડતા ખેડૂતોએ રાહત અનુભવી હતી. આ વરસાદથી ખેતરોમાં પાણી ભરાઈ ગયા હતા. જે પાક માટે ખૂબ જ ફાયદાકારક છે.

ખેડૂતોને સારો પાક મળવાની શક્યતા

લાંબા સમયથી વરસાદની રાહ જોઈ રહેલા ખેડૂતો માટે આ વરસાદ આશીર્વાદ સમાન બન્યો છે. મોંઘા બિયારણ અને ખાતર વાપરીને કરેલા વાવેતરને બચાવવા માટે હવે તેમને મોંઘા ભાવનું પાણી ખરીદવું નહીં પડે. જો આગામી દિવસોમાં પણ આ રીતે વરસાદ ચાલુ રહેશે તો ખેડૂતોને સારો પાક મળવાની શક્યતા વધી જશે.