Kutchના સામખિયાળીમાં રખડતા ઢોરનો આતંક યથાવત, દુકાનમાં આખલો ઘૂસી જતા દુકાનદાર ઈજાગ્રસ્ત

કચ્છના સામખિયાળી શહેરમાં રખડતા ઢોરનો આતંક યથાવત છે. રખડતા ઢોરની સમસ્યા હવે એટલી ગંભીર બની ગઈ છે કે તે હવે માત્ર રસ્તા પર જ નહીં પરંતુ દુકાનોની અંદર પણ રખડતા ઢોર ઘૂસી રહ્યા છે. સામખિયાળીની મુખ્ય બજારમાં બે આખલાઓ વચ્ચે ઘમાશાન યુદ્ધ જામ્યું હતું. આ આખલાઓના યુદ્ધના કારણે એક દુકાનદારને ગંભીર ઈજાઓ પહોંચી હતી. આ બંને આખલાઓ યુદ્ધ લડતા લડતા બજારની એક દકાનમાં ઘૂસી ગયા હતા. જે દરમિયાન દુકાનદાર ગંભીર ઈજાગ્રસ્ત થયો હતો.

સમગ્ર ઘટના સીસીટીવીમાં કેદ

આ સમગ્ર ઘટના સીસીટીવી કેમેરામાં કેદ થઈ હતી. સીસીટીવી ફૂટેજમાં સ્પષ્ટપણે જોવા મળ્યું હતું કે બે આખલા વચ્ચે લડાઈ ચાલી રહી હતી. આ લડાઈ દરમિયાન એક આખલો બેકાબૂ બનીને એક દુકાનની અંદર ઘૂસી ગયો હતો. આખલાના અચાનક દુકાનમાં ઘૂસી આવવાથી દુકાનદાર ગભરાઈ ગયો હતો અને તેને ગંભીર ઈજાઓ પહોંચી હતી. આ ઘટનાએ ફરી એકવાર રખડતા ઢોરની સમસ્યાને ઉજાગર કરી હતી. સામખિયાળીના મુખ્ય બજાર જેવા વ્યસ્ત વિસ્તારમાં પણ આ પ્રકારની ઘટના બનતા લોકોમાં ભયનો માહોલ ફેલાયો હતો.

સ્થાનિકોનો આક્ષેપ તંત્ર નિષ્ક્રિય

રખડતા ઢોરના કારણે ટ્રાફિકની સમસ્યા, અકસ્માતોના બનાવ અને હવે આવી ઘટનાઓનું પ્રમાણ વધતુ જઈ રહ્યું છે. આ ઘટનાએ સ્થાનિક તંત્રની નિષ્ક્રિયતા પર ગંભીર સવાલો ઉભા કર્યા હતા. સ્થાનિકોનો આક્ષેપ હતો કે રખડતા ઢોરની સમસ્યાના નિવારણ માટે તંત્ર દ્વારા કોઈ અસરકારક પગલાં ભરવામાં આવતા નથી. જો તંત્ર દ્વારા આ મામલે કડક કાર્યવાહી કરવામાં આવે તો આવી ઘટનાઓ અટકાવી શકાય છે.