અમદાવાદના મણીનગર વિસ્તારમાં સ્થિત સેવન્થ ડે એડવેન્ટીસ્ટ હાયર સેકન્ડરી સ્કૂલ આખરે સરકાર હસ્તક થઈ છે.અમદાવાદ શહેર ડીઈઓની તપાસમાં સમગ્ર સ્કૂલ જ ગેરકાયદે ચાલતી હોવાનો ભાંડો ફૂટતા શિક્ષણ વિભાગ દ્વારા આ નિર્ણય લેવામાં આવ્યો છે.વિદ્યાર્થી હત્યાની ઘટનાના 119 દિવસ પછી ગેરરીતિ આચરનાર ખાનગી ટ્રસ્ટને સ્કૂલના વહિવટમાંથી હાંકી કાઢવાનો નિર્ણય લેવાતાં સમગ્ર શિક્ષણ આલમમાં ચકચારી મચવા પામી છે.
ડીઈઓને વહિવટદાર તરીકે નિમણુક કરવામાં આવી
શિક્ષણ વિભાગે જાહેર કરેલા સત્તાવાર ઠરાવમાં અમદાવાદ શહેર ડીઈઓને વહિવટદાર તરીકે નિમણુક કરવામાં આવી છે. એ સાથે એવુ પણ કહ્યુ છે કે, આ સ્કૂલમાં અત્યારે નવુ એકપણ એડમિશન આપી શકાશે નહીં. સ્કૂલના સંચાલન અંગે આગામી દિવસોમાં પ્રાથમિક શિક્ષણ નિયામક કચેરી અને શિક્ષણ બોર્ડ દ્વારા સત્તાવાર ગાઈડલાઈન જાહેર કરશે. સરકારના આ નિર્ણય સામે સ્કૂલની નફ્ફટાઈ સામે આવી છે. સ્કૂલ સંચાલકોએ દસ્તાવેજો રજૂ નહીં કરાયા હોવાના દાવાને નકાર્યો છે.
