Ahmedabadના SP.રિંગ રોડ પર મારામારી, પત્નીએ પતિને અન્ય મહિલા સાથે રંગેહાથ ઝડપ્યો

અમદાવાદ શહેરના એસપી રિંગ રોડ પર પરિવારિક વિવાદને લઈને પતિ-પત્ની અને પુત્ર વચ્ચે મારામારીની ઘટના સામે આવી છે. આ સમગ્ર મામલે બોડકદેવ દ્વારા બંને પક્ષોની ફરિયાદ નોંધવામાં આવી છે અને આગળની તપાસ હાથ ધરવામાં આવી છે.

પત્નીએ પતિને અન્ય મહિલા સાથે રંગેહાથ ઝડપ્યો

મળતી માહિતી મુજબ, પતિ અન્ય એક મહિલા સાથે મંદિરે ગયો હોવાનો આરોપ છે. આ બાબતની જાણ થતાં પત્ની પોતાના પુત્ર સાથે ત્યાં પહોંચી ગઈ હતી. ત્યારબાદ એસપી રિંગ રોડ પર પતિની કાર રોકવામાં આવી હતી. કાર રોકતા જ બંને પક્ષો વચ્ચે ઉગ્ર બોલાચાલી શરૂ થઈ ગઈ હતી.

પતિ, પત્ની અને પુત્ર વચ્ચે જાહેરમાં મારામારી

બોલાચાલી થોડા સમયમાં જ ઘર્ષણમાં ફેરવાઈ ગઈ હતી અને પતિ-પત્ની તેમજ પુત્ર વચ્ચે મારામારીની સ્થિતિ સર્જાઈ હતી. રસ્તા પર અચાનક થયેલા આ વિવાદને કારણે આસપાસના લોકો પણ ભેગા થઈ ગયા હતા. ઘટનાની જાણ થતાં પોલીસને જાણ કરવામાં આવી હતી.

બંને પક્ષની ફરિયાદ નોંધી તપાસ હાથ ધરી

પોલીસ સ્થળ પર પહોંચી બંને પક્ષોને શાંત પાડ્યા હતા અને ત્યારબાદ મામલો પોલીસ સ્ટેશન સુધી પહોંચ્યો હતો. આ ઘટનાને લઈને બંને પક્ષોએ એકબીજા સામે ફરિયાદ નોંધાવી છે. પોલીસે બંને પક્ષોના નિવેદનો લઈને સમગ્ર ઘટનાની તપાસ શરૂ કરી છે.

આ પણ વાંચો---     Ahmedabad : ઘાટલોડિયામાં રામેશ્વર મંદિરની આજુબાજુ નશાખોરોનો ત્રાસ, સંદેશ ન્યૂઝે અહેવાલ બતાવતા જ પોલીસનું પેટ્રોલિંગ શરુ થયું