અમદાવાદ જિલ્લાના સાણંદ-વિરમગામ હાઈવે પર આજે એકાએક આગની મોટી ઘટના સામે આવતા અફરાતફરી મચી ગઈ હતી. સાણંદના છારોડી નજીક આવેલા ઈન્દિરાનગર વિસ્તારમાં એક સ્ક્રેપના ગોડાઉનમાં ભીષણ આગ ફાટી નીકળી હતી. આગ એટલી વિકરાળ હતી કે તેના ધુમાડાના કાળા ગોટા કિલોમીટરો દૂર સુધી આકાશમાં જોવા મળ્યા હતા.
વિસ્તારમાં ભયનો માહોલ
રહેણાંક વિસ્તારની નજીક આવેલા આ ગોડાઉનમાં આગ લાગતા સ્થાનિક લોકોમાં ભારે ભયનો માહોલ સર્જાયો હતો. આગના પગલે સમગ્ર ઈન્દીરાનગર વિસ્તારમાં દોડધામ મચી ગઈ હતી. પ્રાથમિક માહિતી મુજબ, ગોડાઉનમાં રહેલો સ્ક્રેપનો મોટો જથ્થો આગની લપેટમાં આવી જતા મિનિટોમાં જ બળીને ખાખ થઈ ગયો છે.
