અમદાવાદ શહેરમાં બેફામ દોડતા ભારે વાહનો માસૂમ નાગરિકો માટે કાળ સમાન સાબિત થઈ રહ્યા છે. અમદાવાદના વાડજ વિસ્તારમાં તાજેતરમાં સર્જાયેલા એક અકસ્માત મામલે 'B' ટ્રાફિક પોલીસે મોટી સફળતા મેળવી છે. પૂરઝડપે ડમ્પર ચલાવી એક રાહદારીનો જીવ લેનાર આરોપી ચાલક સોહનલાલ રોતની પોલીસે ધરપકડ કરી કાયદેસરની કાર્યવાહી હાથ ધરી છે.
શું હતી સમગ્ર ઘટના?
ઘટનાની મળતી માહિતી અનુસાર, વાડજ સર્કલ પાસે વહેલી સવારે એક બેફામ ગતિએ આવી રહેલા ડમ્પરના ચાલકે રસ્તો ઓળંગી રહેલા રાહદારી ધીરુભાઈ પરમારને જોરદાર અડફેટે લીધા હતા. અકસ્માત એટલો ભયાનક હતો કે, ધીરુભાઈનું ઘટના સ્થળે જ કમકમાટીભર્યું મોત નીપજ્યું હતું. અકસ્માત સર્જ્યા બાદ માનવતા નેવે મૂકી ડમ્પર ચાલક પોતાનું વાહન લઈને ફરાર થઈ ગયો હતો. આ ઘટનાને પગલે સ્થાનિક રહીશોમાં ભારે રોષ જોવા મળ્યો હતો અને ડમ્પર ચાલકોના ત્રાસ વિરૂદ્ધ ઉગ્ર આક્રોશ વ્યક્ત કરવામાં આવ્યો હતો.
