વડોદરા જિલ્લાના ડભોઈ પંથકમાંથી કાયદો અને વ્યવસ્થાની સ્થિતિ સામે ગંભીર સવાલો ઊભા કરતી એક આઘાતજનક ઘટના સામે આવી છે. ડભોઈમાં એક સામાન્ય અરજીની તપાસના અર્થે ગયેલા પોલીસ જવાનો પર અસામાજિક તત્વો દ્વારા એકસંપ થઈને જીવલેણ હુમલો કરવામાં આવ્યો હોવાનો સનસનાટીભર્યો મામલો પ્રકાશમાં આવ્યો છે. હુમલાખોરોએ ખાખી વર્દીનો જરાપણ ડર રાખ્યા વિના પોલીસ જવાનો પર ઈંટો વડે ધાણીપાસી હુમલો કર્યો હતો, જેમાં હેડ કોન્સ્ટેબલ અને કોન્સ્ટેબલ બંને ગંભીર રીતે ઘાયલ થયા છે. આ ઘટનાને પગલે સમગ્ર વડોદરા ગ્રામ્ય પોલીસ બેડામાં ભારે ચકચાર મચી ગઈ છે.
અરજીના અનુસંધાને તપાસ કરવા ઘટનાસ્થળે પહોંચ્યા હતા
મળતી વિગતો મુજબ, ડભોઈ પોલીસ સ્ટેશનના હેડ કોન્સ્ટેબલ નવીનભાઈ અને કોન્સ્ટેબલ શુભમભાઈ સરકારી ફરજના ભાગરૂપે એક અરજીના અનુસંધાને તપાસ કરવા ઘટનાસ્થળે પહોંચ્યા હતા. આ દરમિયાન ત્યાં હાજર આસિફ અને હુસેન સહિતના શખ્સોએ પોલીસ સાથે ઉગ્ર બોલાચાલી કરી હતી.
જવાનો પર ઈંટોના છુટ્ટા ઘા મારવાનું શરૂ કરી દીધું
મામલો એટલો બિચક્યો હતો કે આ શખ્સોએ ઉશ્કેરાઈને કાયદો હાથમાં લીધો અને પોલીસ જવાનો પર ઈંટોના છુટ્ટા ઘા મારવાનું શરૂ કરી દીધું હતું. હુમલામાં લોહીલુહાણ થયેલા બંને પોલીસ જવાનોને તાત્કાલિક ધોરણે નજીકની હોસ્પિટલમાં સારવાર અર્થે ખસેડવામાં આવ્યા છે, જ્યાં હાલ તેમની સારવાર ચાલી રહી છે.
4 રીઢા આરોપીઓની અટકાયત
આ હાઈ-પ્રોફાઈલ કેસની ગંભીરતાને જોતાં વડોદરા ગ્રામ્ય પોલીસે તાત્કાલિક એક્શન મોડમાં આવીને આસિફ, હુસેન સહિત કુલ 9 આરોપીઓ સામે ફરજ પરના સરકારી કર્મચારી પર હુમલો અને જાનથી મારી નાખવાના પ્રયાસ હેઠળ ગુનો દાખલ કર્યો છે. પોલીસે દરોડા પાડીને કુલ 9 પૈકી 4 રીઢા આરોપીઓની અટકાયત કરી લીધી છે, જ્યારે ફરાર અન્ય 5 આરોપીઓની શોધખોળ માટે અલગ-અલગ ટીમો બનાવી ચક્રો ગતિમાન કર્યા છે. ઘટનાસ્થળ પરથી પાકા પુરાવા એકત્રિત કરવા માટે એફએસએલ (FSL) ની ટીમની પણ મદદ લેવામાં આવી છે. રક્ષક જ ભક્ષક સામે અસુરક્ષિત બનતા સ્થાનિક સ્તરે સુરક્ષા વ્યવસ્થા સામે મોટા સવાલો ઉઠી રહ્યા છે.
આ પણ વાંચો--- Gujarat Latest News live: ગુજરાત યુનિવર્સિટી પોલીસ સ્ટેશનમાં પ્રજ્ઞાચક્ષુને માર મારનાર મહિલા PSI સોનલ રાઠોડ સસ્પેન્ડ
