અમદાવાદ શહેર પોલીસ દ્વારા પોલીસ અધિકારીઓ અને કર્મચારીઓના માનસિક સ્વાસ્થ્ય અને કાર્યક્ષમતામાં વધારો કરવાના ઉમદા હેતુથી 'વર્લ્ડ મેડિટેશન ડે'ની વિશેષ ઉજવણી કરવામાં આવી હતી. અમદાવાદ શહેર પોલીસ મુખ્ય મથક, શાહીબાગ ખાતે Art of Living ના સહયોગથી આ ખાસ કાર્યક્રમનું આયોજન કરવામાં આવ્યું હતું.
પોલીસ કમિશનર જી. એસ. મલિકનું માર્ગદર્શન
આ કાર્યક્રમ શહેર પોલીસ કમિશનર જી. એસ. મલિકની સીધી આગેવાની હેઠળ યોજાયો હતો. જેમાં શહેરના ઉચ્ચ પોલીસ અધિકારીઓ સહિત મોટી સંખ્યામાં પોલીસ કર્મચારીઓએ ઉત્સાહભેર ભાગ લીધો હતો. આ પ્રસંગે પોલીસ કમિશનરે જણાવ્યું હતું કે, પોલીસની નોકરી અત્યંત પડકારજનક અને તણાવપૂર્ણ હોય છે. આવા સમયે મન શાંત રાખવા માટે 'ધ્યાન' એક અનિવાર્ય જીવન કૌશલ્ય છે.
