ડાંગ જિલ્લાના મુખ્ય મથક આહવા ખાતે માર્ગ અને મકાન વિભાગ (સ્ટેટ) દ્વારા રસ્તાઓ પર થયેલા ગેરકાયદેસર દબાણો દૂર કરવાની કડક ઝુંબેશ શરૂ કરવામાં આવી છે. માર્ગ અને મકાન વિભાગે રસ્તાની હદમાં કે તેને અડીને લારી-ગલ્લાં, પાકાં બાંધકામો અને અન્ય દબાણો ઊભા કરનારા દુકાનદારો અને ફેરિયાઓને નોટિસ આપી હતી.
સ્વૈચ્છિક રીતે હટાવવા માટે સૂચના આપવામાં આવી
નોટિસમાં સ્પષ્ટ જણાવાયું હતું કે સોમવાર સુધીમાં દબાણકર્તાઓ સ્વૈચ્છિક રીતે દબાણ હટાવી લે, અન્યથા વિભાગ દ્વારા કાયદેસરની કાર્યવાહી કરીને દબાણ દૂર કરવામાં આવશે. ડાંગ જિલ્લા પ્રાંત અધિકારી કાજલ આંબલીયા દ્વારા આજે આહવા નગરમાં માર્ગ અને મકાન વિભાગ અને સિટી સર્વે વિભાગને પોલીસ બંદોબસ્ત સાથે દબાણ સ્વૈચ્છિક રીતે હટાવવા માટે સૂચના આપવામાં આવી હતી.
